"Xəzər TV"nin prezidenti Murad Dadaşov Bakıda keçirilən Musiqi Forumunun ilk günündə səsləndirilən tənqidlərə münasibət bildirib.
Modern.az xəbər verir ki, Xalq Artisti bu barədə Forumun ikinci günündə keçirilən panel müzakirəsi zamanı danışıb.
O, auditoriyanın zövqünü formalaşdırmaq üçün çox çalışdıqlarını bildirib:
"Ötən gün bəzi forum iştirakçıları TV proqramlarının ümumi zövqü pozduğunu söylədilər. Biz deyirik ki, televiziya, televiziya verilişləri və onların istehsal etdiyi məhsullar zövqümüzcə deyil. Onda sual yaranır ki, bu məhsullar kimin zövqü əsasında formalaşıb ərsəyə gətirilir? Telekanalları apteklə müqayisə edə bilərik. Siz aptekə girib dərmandan şikayətlənə bilərsiniz. Amma "bu pisdir" deyə bilməzsiniz. Çünki aptek həmin dərmanı hazırlayan deyil, onu satandır. Siz dərmanın pis olması ilə bağlı aptekə yox, həmin dərmanı istehsal edənə şikayətinizi bildirə bilərsiz. Biz müqayisə etməyi bacarmalıyıq. Biz sadəcə yayımçıyıq. Bu baxımdan sizlərin də bizə kömək etməsini istəyirik".
Qeyd edək ki, xalq artisti Fərhad Bədəlbəyli Musiqi Forumunda telekanalların proqram siyasətinin olduqca vacib məsələ və problem olduğunu bildirib.
"Mən istəməzdim ki, proqramların 90 faizi əyləncə motivli olsun. Heç olmasa, bunların 30-40 faizində ciddi sənət, ciddi musiqi görmək arzumdur. Elə olur ki, bu verilişlərə baxanda adam utanır. Biz bu sözləri ifadə etməkdən çəkinməməliyik, özümüzü tənqid etməkdən utanmamalıyıq", - o qeyd edib
