10 dekabr 2020-ci il tarixli parad Vətən müharibəsindən sonra keçirilən ilk Zəfər paradı idi. Zəfər paradı Azərbaycanın gücünü, Ordunun qüdrətini, Prezidentin qətiyyətini bir daha nümayiş etdirdi. Azərbaycan xalqı məğlub xalqdan qalib xalqa çevrildi. Bu qələbəni Azərbaycan xalqına yaşadan Ali Baş Komandan, möhtərəm Prezident İlham Əliyev və rəşadətli Azərbaycan Ordusudur. Bu gün Azərbaycan Ordusu dünyanın 50 güclü ordusundan biridir. Azərbaycan Ordusu günü-gündən öz gücünü, qüdrətini daha da artırır. Bütün bunlar onu deməyə əsas verir ki, Ordumuz bu gün öz torpaqlarını qorumaq, düşməni zərərsizləşdirmək üçün bütün imkanlara malikdir.
2020-ci il 10 dekabr tarixində Azərbaycanın Vətən müharibəsindəki qələbəsi şərəfinə Bakının Azadlıq Meydanında keçirilən Zəfər paradında Prezident, Silahlı Qüvvələrin Müzəffər Ali Baş Komandanı İlham Əliyevin dediyi sözləri bir daha xatırlayaq:
“Azadlıq meydanında paradlar çox keçirilib. Ancaq bu paradın xüsusi önəmi var. Bu, Zəfər paradıdır. Bu, tarixi hadisədir”.
Həmin parada işğaldan azad olunan torpaqlarımızda dalğalanan Qələbə bayrağımız da gətirilməklə, qalib Ordumuzun bölmələrini, döyüş texnikalarımızı nümayiş etdirməklə hərbi gücümüzü dünyaya göstərdik.
Eyni zamanda Türkiyə prezidentinin iştirakı, iki ölkə rəhbərinin birgə çıxışı, Azərbaycanın mövqeyini dəstəkləyən fikirlərin irəli sürülməsi bu paradın niyyətini və önəmini bir daha artırdı.
Paradı Azərbaycan Silahlı Qüvvələrinin Müzəffər Ali Baş Komandanı, Azərbaycan Respublikasının Prezidenti cənab İlham Əliyev və fəxri qonaq qismində dəvət olunmuş Türkiyə Prezidenti Rəcəb Tayyib Ərdoğan qəbul etdi.
Zəfər paradında 3000 Azərbaycan əsgəri və zabiti ilə yanaşı türk əsgər və zabitləri də iştirak edirdi. Azərbaycan və türk əsgərlərinin çiyin-çiyinə Azadlıq meydanından keçməsi xalqların tarixində əbədi qalacaq qürurverici hadisədir. 44 günlük Qarabağ müharibəsinin ilk günündən son gününədək Türkiyə Azərbaycanın yanında oldu, haqq səsimizə dəstək verdi. İstər Rəcəb Tayyib Ərdoğanın qətiyyətli çıxışları, istərsə də Türkiyənin digər rəsmi şəxslərinin Vətən müharibəsi zamanı etdiyi çıxışlar bizə əlavə ruh və güc verdi. Türkiyə tək müharibə ərzində deyil, müharibədən sonra da, sülh dönəmində də Azərbaycanın mövqeyini dəstəklədi və tariximizin ən önəmli anında – Zəfər Paradında bizlə bir yerdə oldu. Azadlıq meydanında hər iki ölkənin hərbi qüvvələrinin birgə paradı dünyaya verilən aydın mesaj idi.
Bu gün 44 günlük müharibə zamanı döyüş meydanıda məğlubiyyətə məruz qalan düşməndən əldə etdiyimiz hərbi qənimətlərlə yaxından tanış olmaq üçün Hərbi Qənimətlər Parkını hamı ziyarət edir. Bu park ordumuzun gücünü və potensialını nümayiş etdirən bir əsər və qürur yeridir. Hərbi Qənimətlər Parkını ziyarət edən hər kəs müzəffər Azərbaycan ordusunun qüdrətinin şahidi olur.
Bu canlı muzeyin memarlarından olan şəhidlərimizə Allahdan rəhmət diləyir, qazilərimizə uzun ömür arzulayırıq.
Azərbaycan Prezidenti, Ali Baş Komandan İlham Əliyevin rəhbərliyi altında uğurla davam etdirilən siyasət nəticəsində Azərbaycan Silahlı Qüvvələri bu gün regionun modern texnika ilə təchiz edilən, Vətənin müdafiəsinə daim hazır olan yüksək nizam-intizama malik bir quruma çevrilib.
44 günlük qalibiyyətli Vətən müharibəsində düşmənə ağır zərbələr vuraraq torpaqlarımızı işğaldan azad edən ordumuz bu şanlı Zəfəri artıq Xankəndi şəhərindən dünyaya nümayiş etdirir. Noyabrın 8-də Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi parad keçirildi.
Bu paradın keçirilməsi rəşadətli Ordumuzun, Müzəffər Ali Baş Komandan İlham Əliyevin rəhbərliyi ilə qazandığı Böyük Qələbə, müasir müstəqil Azərbaycan dövlətinin hərbi qüdrətinin, iqtisadi gücünün nümayişi ilə yanaşı, xalqımızın qələbə əzminin də əyani təsdiqidir.
Bu gün bütün dünya görür ki, Qarabağ Azərbaycandır! Qarabağ bizimdir! Eşq olsun Azərbaycan Ordusuna! Yaşasın Türkiyə-Azərbaycan dostluğu, qardaşlığı! Yaşasın Azərbaycan əsgəri!
Ceyhun Məmmədov,
Milli Məclisin deputatı
