“Bakı Fond Birjası” QSC (BFB) 15 müxtəlif istiqamətli vakant iş yerinə qəbul prosesi elan edib.
Modern.az xəbər verir ki, vakansiyalar haqqında ətraflı məlumatı BFB-nin internet saytında (//www.bfb.az/en/careers) yerləşdirilib.
“BFB 2023-cü ili rekord göstəricilərlə başa vurur və bu hələ başlanğıcdır. Hazırda BFB olaraq 2024-2026-cı illəri əhatə edəcək yeni korporativ strategiya üzərində işləyirik. Yeni strategiyamısın əsas hədəflərindən biri bütün bazar iştirakçılarının inkişafını təmin etməkdir. Komandamıza qoşulacaq yeni əməkdaşların bu strategiyanın həyata keçirilməsində bizə dəstək olacaqlarına ümid edirik” , - deyə BFB-nin Müşahidə Şurasının sədri Fərid Axundov bildirib.
“Bakı Fond Birjası” QSC Azərbaycan Respublikasının iqtisadiyyat və maliyyə sektorunda 26 ildir ki, fəaliyyət göstərir. Bugünkü tarixə illik dövriyyəsi 23 milyard manat olan “Bakı Fond Birjası” QSC unikal tarixə, fond bazarının peşəkar iştirakçıları ilə möhkəm münasibətlərə və xarici ölkələrin bir çox fond birjaları ilə tərəfdaşlıq münasibətlərinə malikdir.
Birjanın fəaliyyətinin əsas istiqaməti ölkənin iqtisadi artımına dəstək olmaqdan, həmçinin maliyyə sistemində satış qabiliyyətinin təkrar paylanması üçün müvafiq platformanı təmin etməkdən, yerli və əcnəbi investorlar üçün şəffaf investisiya mühiti təqdim etməkdən ibarətdir.
