"Azərbaycanın hər iki tərəfi - Azərbaycan və Naxçıvan arasında əlaqə bizim üçün milli təhlükəsizlik baxımından, həmçinin Orta dəhliz üçün alternativ marşrutun təmin edilməsi baxımından çox vacibdir".
Modern.az xəbər verir ki, bunu Azərbaycan Respublikası Prezidentinin xüsusi tapşırıqlar üzrə nümayəndəsi Elçin Əmirbəyov "Guardian"a müsahibəsində deyib.
"Biz daha çox vaxt itirə bilmərik. Üç il keçib, amma Ermənistan hələ də 42 km-lik yolun texniki-iqtisadi qiymətləndirməsinə başlamayıb. Təbii ki, biz Ermənistanı öz öhdəliklərini yerinə yetirməyə məcbur edə bilmərik və bu dəhlizi güc və ya bu kimi üsullarla təmin etmək üçün işğal edəcəyimizlə bağlı fikirlər cəfəngiyatdır. Biz B planı olaraq İran ərazisi vasitəsilə dəmir yolu və avtomobil yolu ilə əlaqə qurmaq üçün İrana müraciət etdik", - azərbaycanlı rəsmi bildirib.
Onun sözlərinə görə, alternativ marşrutun mövcudluğu Ermənistanı öz ərzisindən keçən dəhlizə müqavimət göstərməklə nələr itirə biləcəyini anlamağa kömək edə bilər.
E.Əmirbəyov sülh sazişinin imzalanmasından sonra tərəflər arasında mübahisələrin həlli mexanizmi barədə suala cavabında vurğulayıb ki, Azərbaycan bu məsələdə heç bir kənar müdaxilə olmadan ikitərəfli Ermənistan-Azərbaycan Komissiyasının yaradılması ideyasına üstünlük verir: “Azərbaycanın əsas hissəsi ilə Naxçıvan arasında nəqliyyat əlaqələrinin təmin edilməsinə gəlincə, Bakı bu məsələni təkcə Çini Avropa ilə birləşdirən Orta Dəhliz üçün alternativ marşrutun yaradılması kontekstində deyil, həm də öz milli təhlükəsizliyinin təmin edilməsinin mühüm elementi kimi dəyərləndirir”.
