Modern.az

Azərbaycanın suvarma sistemlərinin rəqəmsal xəritəsi hazırlanacaq

Azərbaycanın suvarma sistemlərinin rəqəmsal xəritəsi hazırlanacaq

Aktual

16 May 2024, 15:34

Peyk təsvirləri və kosmik həllərdən istifadə etməklə Azərbaycanın aktiv kənd təsərrüfatı ərazilərində əkin növlərinin xəritəsi, o cümlədən pivot suvarma sistemlərinin coğrafi məlumat bazasının yenilənməsi üzrə rəqəmsal xəritə hazırlanacaq.

 

Modern.az xəbər verir ki, bu, Kənd Təsərrüfatı Nazirliyi və Rəqəmsal İnkişaf və Nəqliyyat Nazirliyi yanında Kosmik Agentliyi ("Azərkosmos") arasında imzalanmış əməkdaşlığın genişləndirilməsi üzrə Anlaşma Memorandumunda əksini tapıb.

 

Sənəd hazırda Bakıda keçirilən 17-ci Azərbaycan Beynəlxalq Kənd Təsərrüfatı Sərgisində (“Caspian Agro”) imzalanıb.

 

Əsas məqsəd iqlim dəyişikliyi ilə mübarizə çərçivəsində peyk təsvirləri əsasında iqlimin kənd təsərrüfatına təsirlərinin qiymətləndirilməsi işlərinin aparılmasıdır.

 

Məlumdur ki, kənd təsərrüfatı hava və iqlimə çox həssas olan sahədir. İqlim dəyişiklikləri (temperatur, yağıntı və şaxta vaxtı kimi) bitkilərin vegetasiya dövrünü uzadır və ya bəzi bölgələrdə yetişdirilən kənd təsərrüfatı məhsullarının əkinçilik imkanlarını çətinləşdirir, aqroekosistemə mənfi təsir göstərir.

 

Hazırda qlobal miqyasda kənd təsərrüfatı əməliyyatlarının təxminən 30 %-40 %-də məhsuldarlığı və əkin sahələrinin davamlılığını artırmaq üçün peyk məlumatlarından istifadə olunur. Bu peyklər vasitəsilə məhsulun sağlamlığının monitorinqi, məhsuldarlığın proqnozlaşdırılması, su ehtiyatlarının idarə edilməsi və zərərvericilərin aşkarlanması daxil olmaqla, dəqiq əkinçilik üçün mühüm məlumatlar əldə edilir.

 

Ölkənin iqlim dəyişmələri üzrə mötəbər tədbir – COP29-a ev sahibliyi etdiyi ərəfədə qurumlararası razılaşmanın nəticəsi olaraq əldə ediləcək təhlil məlumatları xüsusi əhəmiyyət kəsb edir.

 

Xatırladaq ki, ətraf mühitin qorunması, ekoloji və iqlim dəyişikliyinin davamlı monitorinqini həyata keçirən Azərkosmos bir müddət əvvəl qlobal iqlim dəyişikliyinin Azərbaycanda təsirinə dair rəqəmsal iqlim platformasını //climatereport.az/ təqdim edib.

Youtube
Kanalımıza abunə olmağı unutmayın!
Keçid et
Sərhəd pozuldu - Erməni sərhədçiləri Tavuşa yerləşdi