Türkiyənin Ege Universitetinin Fənn fakültəsinin Biokimya kafedrasının dosenti, həmçinin Azərbaycan Dövlət İqtisad Universitetinin (UNEC) Beynəlxalq Nanotexnologiya və Biokimyəvi Toksikologiya Tədqiqat Mərkəzinin həmrəhbəri Aziz Eftekhari UNEC-də elmi ezamiyyətdə olub. Səfər UNEC ilə Ege Universiteti arasında elmi əməkdaşlıq münasibətlərini gücləndirmək, birgə tədqiqat layihələrini həyata keçirmək məqsədilə təşkil edilib.
UNEC-dən Modern.az-a bildirilib ki, ezamiyyət zamanı Aziz Eftekhari laboratoriyalarda “Lənkəran-Astara çayı ilə istehsal olunan müxtəlif içkilərin qidalanma, fiziki-kimyəvi və farmakoloji xüsusiyyətləri” mövzusunda doktorluq dissertasiyasının təcrübi sınaqlarını aparıb və müəyyən eksperimentlərə başlayıb. Eyni zamanda, bu eksperimentlərin bir hissəsi Ege Universitetində aparılır.
Səfər çərçivəsində, həmçinin iki universitetin birgə iştirakı ilə COP29-la (BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası) bağlı reallaşdırılması nəzərdə tutulan layihənin ilkin müzakirəsi keçirilib, birgə elmi nəşrlər və layihələrin icrası barədə fikir mübadiləsi aparılıb.
