Günün batdığı Hacı Kərim dağının meşələrinə tərəf baxan qədim Sincan kəndinin Orta məhəlləsində, Sincan çayının sol yatağının kənd yoluna bitişik hissəsində 1918-ci ilin iyun ayında 5-ci Qafqaz İslam Ordusunun hay-daşnak dəstələrinin Türk-Müsəlman əhalisinə qarşı amansız silahlı basqınlarına qarşı sinəsini sipər edən Naməlum Şəhid Türk Əsgərinin məzarı var. Şəhidim bu Müqəddəs Məqamdakı Ruhu dolanır, məkan camaatın inanc-iman ocağıdır.
Görünür Şəhid Türk əsgərinin dəfni üçün bu yerin seçilməsi 1918-ci ilin isti və sərin yay günlərində təsadüfi olmayıb. Çünki həmin çağda bu yer Cümə məscidinin (tikilisi 1980-ci ilədək qalırdı, inidi yurd yeri bilinir) həyəti olub, el-oba arasında ziyarət edilən “Pir heyvalıq” ərazisinə bitişik olub.
Şəhid məzarının üstündə yazısız, bəlirtisiz qəbir daşı var, nişanə kimi, “torpaq çiynində” kənd sakini İsa Həmid oğlu Hacıyev (1928-2016) tərəfindən 2015-ci ildə əkilmiş qızılgül kolu və heyva ağacı kök salıb, ətrafının dəmir çərçivəsini də o düzəldib.
Bir az aralıda ucalan, yaşı 450-500 ilə çatan palıd ağacı isə payız xəzəllərinə bürünmüş bu Müqəddəs Məqamın/Məkanın sanki əzəli və daimi keşikçisidir...
(Yazının hazırlanmasında Oğuz rayonu, Sincan kənd sakinləri Nizami Şəmsəddin oğlu Şəmsəddinovun (1940-2015), Mənsur Abduləzir oğlu Əhmədovun (1968), Teymur Babaş oğlu Məmmədovun (1971), Elçin Qərib oğlu Xasıyevin (1971) və Ramin Nizami oğlunun (1979) məlumatlarından istifadə edilmişdir).
Qismət Yunusoğlu,
Bakı Dövlət Universitetinin müəllimi (050.372.60.08.)
