Bu gün İstanbulda “3+3” regional məsləhət platformasının üçüncü iclası keçirlir.

İclasda Azərbaycan, Ermənistan, İran, Rusiya və Türkiyənin xarici işlər nazirləri iştirak edir.

Modern.az xəbər verir ki, TASS-ın məlumatına görə, görüş iştirakçıları iqtisadi əməkdaşlığın genişləndirilməsi, o cümlədən regional nəqliyyat dəhlizlərinin yaradılması məsələsində də çıxış edəcəklər.

TRT Haber telekanalı diplomatik mənbələrə istinadən bildirib ki, Cənubi Qafqaz üzrə “3+3” platformasının cümə günü İstanbulda keçirilən iclasının yekunlarına əsasən, birgə bəyannamənin qəbulu planlaşdırılır.

Sənəddə region ölkələrinin mövcud problemlərin dialoq yolu ilə həllinin vacibliyi, suverenlik və ərazi bütövlüyünə hörmət, daxili işlərə qarışmamaq, güc tətbiqi təhlükəsinin qadağan edilməsi və insan hüquqlarına hörmətlə yanaşmanın vacibliyi vurğulanacaq.

Altıtərəfli əməkdaşlıq formatı təşəbbüsü təxminən dörd il əvvəl Azərbaycan və Türkiyə liderləri İlham Əliyev və Rəcəb Tayyib Ərdoğan tərəfindən irəli sürülüb, sonradan platforma “3+3” adlandırılıb. Rusiya və İran bu ideyanı alqışlayıblar və Ermənistan da bu formata qoşulub.
Tiflis hələ ki təklif olunan konfiqurasiyada əməkdaşlıqdan imtina edərək bildirib ki, nə qədər ki, Rusiya Gürcüstan ərazilərini işğal edib, ölkələr arasında əməkdaşlıq mümkün deyil.