Qayıdış və Dirçəliş Naminə Gənclər Təşkilatı Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Qarabağa və Şərqi Zəngəzura köçürülmüş sakinlərə dəstək tədbirləri” layihəsinə Laçın şəhərində 8 noyabr Zəfər bayramı günündə yekun vurub.
Tədbir öncə torpaqlarımızın azadlığı və ərazi bütövlüyü uğrunda şəhid olmuş Vətən övladlarının ruhunun 1 dəqiqəlik sükutla yad edilməsi ilə açıq elan edilib.
Qayıdış və Dirçəliş Naminə Gənclər Təşkilatının sədri Vüqar Qədirov Gəncə, Ağcabədi, Zəngilan, Füzuli və Laçın rayonlarında həyata keçirilən layihə barədə məlumat verib. Bildirib ki, ölkə Prezidenti, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə rəşadətli ordumuz 44 gün davam edən Vətən Müharibəsində 30 ilə yaxın Azərbaycan torpaqlarını işğal altında saxlayan, 1 milyondan artıq soydaşlarımızı öz dədə-baba torpaqlarından zorla çıxararaq məcburi köçkünə çevirən, 20-ci əsrin ən dəhşətli faciələrindən olan Xocalı soyqırımını törədən, işğal olunmuş ərazilərimizdə qeyri-qanuni məskunlaşdırma siyasəti həyata keçirən Ermənistanı kapituliyasiya aktını imzalamağa məcbur etdi. Nəticədə Azərbaycanın ərazi bütovlüyü bərpa edildi, Laçın, Ağdam, Kəlbəcər rayonları bir güllə atılmadan Azərbaycana qaytarıldı. V.Qədirov Müzəffər Ordumuzun 2023-cü ilin sentyabr ayının 20-də bir gündən də az apardığı antiterror əməliyyatı nəticəsində Qarabağda dövlət suverenliyini bərpa etdiyini, bununlada Azərbaycan torpaqlarında yuvalanmış, 200 ildən artıq terror, təxribat, işğal siyasəti həyata keçirən ermənilərə və ona havadarlıq edən dövlətlərin təcavüzkar siyasətinə birdəfəlik son qoyilduğunu vurğulayıb.
“Böyük Qayıdış Dövlət Proqramı” çərçivəsində Qarabağda və Şərqi Zəngəzurda aparılan tikinti-quruculuq işlərinin sürətlə davam etdiyini, Laçın şəhərinin də simasını dəyişərək ölkəmizin ən gözəl şəhərlərindən birinə çevrildiyini bildirən natiq, Prezidentin Laçın rayonunda xüsusi nümayəndəsi Məsim Məmmədova və “Laçın Abadlıq Xidməti” ASC-nin əməkdaşlarına minnətdarlığını bildirib.
Layihənin psixoloqu, “Zirvə” Mədəniyyət və incəsənət ictimai birliyinin sədri, Birinci Qarabağ Müharibəsinin veteranı, şair Şahin Qədirov çıxışında düşmən üzərində qazandığımız qələbənin bütün xalqımızın mənəvi-psixoloji durumuna öz müsbət təsirini göstərdiyini, keçmiş məcburi köçkün əhalinin tezliklə öz dədə-baba yurduna qayıtmalarını səbrsizliklə gözlədiklərini bildirib.
Layihənin eksperti Turanə Orucova “Böyük Qayıdış Dövlət Proqramı” Qarabağda və Şərqi Zəngəzurda - Laçın, Şuşa, Füzuli, Zəngilan, Cəbrayıl, Kəlbəcər, Xocalı, Xankəndi, Qubadlıda aparılan tikinti-quruculuq işlərindən, yüksək infrastruktura malik yaşayış komplekslərində yaşayan sakinlərin işlə təmin olunmasından, gələcəkdə həmin ərazilərdə yeni iş yerlərinin açılması üçün görülən işlərdən danışıb.
Laçın şəhər “Lasinema klub”da keçirilən tədbirdə Prezidentin Laçın rayonunda xüsusi nümayəndəsi Məsim Məmmədov, Xüsusi nümayəndəliyin əməkdaşları, Laçın rayonunda Bərpa, Tikinti və İdarəetmə Xidmətinin, “Laçın Abadlıq Xidməti” ASC-nin əməkdaşları, şəhid ailələri, qazilər, hərbçilər, rayonun hüquq-mühafizə orqanlarının rəhbərləri, Laçın şəhər sakinləri iştirak ediblər.
Tədbirdən sonra Azərbaycan Prezidentinin Laçın rayonunda Xüsusi nümayəndəliyinin və “Laçın Abadlıq Xidməti” ASC-nin birgə təşkil etdiyi böyük konsert proqramı hər bir iştirakçıda böyük əhval-ruhiyyə və xoş ovqat yaradıb.
