“Qərb KİV-ləri Ukraynaya Rusiya Federasiyasının dərinliklərinə zərbələr endirməsinə qoyulan qadağanın aradan qaldırıldığını bildirib. Ancaq belə şeyləri ictimaiyyətə açıqlamaq olmaz”.

Modern.az “Unian”a istinadən xəbər verir ki, bunu Ukrayna prezidenti Vladimir Zelenski deyib.

O, qeyd edib ki, bir müddət əvvəl Qərb tərəfdaşlarına təqdim edilən “Qələbə planı”nda digər məsələlərlə yanaşı, Ukrayna ordusunun uzaq mənzilli qabiliyyətinə dair bənd də var. Zelenski qeyd edib ki, bu, planın əsas bəndlərindən biridir.

“Bu gün mediada çoxları deyir ki, biz müvafiq tədbirlər görmək üçün icazə almışıq. Amma zərbələr sözlə alınmır. Belə şeylər açıqlanmır. Raketlər özləri öz sözünü deyəcək. Şübhəsiz…”, - Ukrayna prezidenti əlavə edib.

“Nyu-York Tayms”ın məlumatına görə, ABŞ prezidenti Co Bayden Ukraynaya Rusiya ərazisinə dərin zərbələr endirmək üçün Birləşmiş Ştatların verdiyi silahlardan istifadə etməsinə mane olan məhdudiyyətləri aradan qaldırıb. Ukraynaya ATACMS raketləri ilə Rusiya ərazisinə zərbə endirməyə icazə verilib.

Fransanın "Le Figaro" nəşri yazır ki, Fransa və Böyük Britaniya da Ukraynaya Rusiyanın dərinliklərinə zərbə endirməyə icazə verib.

Nəşrin məlumatına görə, Paris və London Kiyevə "SCALP" və "Storm Shadow" raketləri ilə hücumlar etməyə qadağanı aradan qaldırıb.

Mənbələrin bildirdiyinə görə, ilk dərin zərbələrin 306 km-ə qədər mənzilli ATACMS raketlərindən istifadə edilməklə həyata keçiriləcəyi ehtimal edilir.