"Rayonlarda poçt məntəqələrinin bağlanması məsələsi ilə bağlı deyim ki, bu poçt məntəqələrində təkcə poçt xidmətləri göstərilmirdi, bu məntəqələrdə eyni zamanda kommunal ödənişlər qəbul olunurdu. İndi bu məntəqələrin bağlanması əhali arasında narazılıq yaradıb."
Modern.az xəbər verir ki, bunu millət vəkili Vasif Qafarov Milli Məclisin Aqrar siyasət, Ailə, qadın və uşaq məsələləri, Elm və təhsil komitələlərinin birgə iclasında gələn ilin büdcə zərfinin müzakirəsi zamanı deyib.
Deputat bildirib ki, poçt məntəqələri bağlanırsa, həmin yerlərdə heç olmasa "Milli Ön" aparatları qoyulsun ki, əhali kommunal və digər ödənişlərini ödəsin.
Maliyyə naziri Samir Şərifov bildirib ki, bununla Mərkəzi Bank ilə Rabitə və Yüksək Texnologiyalar Nazirliyi məşğul idi:
"Şöbələrin fəaliyyətinin səmərəsiz olması nəzərə alınaraq onlara məhdud şəkildə bank xidmətlərinin göstərilməsi üçün şərait yaradılmışdı. Bu xidmətlər pul köçürmələri və kommunal xidmətlərin ödənişidir. Biz araşdırıb poçt şöbələri üçün digər mümkün məsələlərə də baxacağıq."
