Bəzən restoranlarda hesab gəldiyi zaman qəbzdə “servis haqqı” yəni xidmət haqqı kimi hansısa faiz məbləğinin hesablandığını görürük. Bu isə bir çox hallarda müştəriləri narahat edir və müəyyən mübahisələrə səbəb olur.

 

Modern.az-ın məlumatına görə, məsələ ilə bağlı vəkil Mirhüseyn Həbibli danışıb. O bildirib ki, mülki qanunvericiliyə əsasən, tərəflər arasında müqavilələr şifahi bağlana bilər:

 

“Lakin bu zaman tərəflərə müqavilənin şərtləri məlum olmalıdır. Belə ki, restoranlarda servis haqqı tələb edilirsə, bu barədə əvvəlcədən menyuda qeyd mövcud olmalıdır. Müştəri bununla tanış edilməlidir. Servis haqqı barədə məlumatda bunun məbləği yaxud necə hesablanacağı göstərilməlidir. Bundan sonra müştəridən servis haqqını tələb etmək mümkündür. Müştəriyə hesab təqdim edildiyi zaman da qəbzdə servis haqqı barədə məlumat qeyd edilməlidir. Restoran tərəfindən bu şərtlərə əməl edilibsə, servis haqqının tələb edilməsinə yol verilir. Bu şərtlərə əməl edilməyibsə, heç bir iaşə obyekti tərəfindən servis haqqı tələb edilə bilməz”.