Xəbər verdiyimiz kimi, ötən gün Tovuzda ağır yol-nəqliyyat hadisəsi baş verib. Hadisə zamanı 5-i hərbçi olmaqla 6 nəfər həyatını itirib, 13 yaşlı Z.Həsənov xəsarət alıb.
TƏBİB Modern.az-ın sorğusuna cavab olaraq yeniyetmənin son vəziyyətini açıqlayıb.
Bildirilib ki, yeniyetmə saat 20:40 radələrində aqonal vəziyyətdə Tovuz Rayon Mərkəzi Xəstəxanasının Təcili və təxirəsalınmaz tibbi yardım şöbəsinə hospitalizasiya olunub.
"Başın, döş qəfəsinin, bədənin müxtəlif nahiyələrinin qapalı və açıq zədələnməsi diaqnozu qoyulub və zəruri tibbi yardım göstərilib.
Pasiyent ixtisaslı tibbi xidmət üçün Gəncə Şəhər Birləşmiş Xəstəxanasının nəzdində olan Abbas Səhhət adına xəstəxanaya təxliyə olunub. Hazırda müalicəsi Reanimasiya şöbəsində davam etdirilir, süni tənəffüs aparatına qoşulub, vəziyyəti ağırdır", - deyə məlumatda bildirilir.
Qeyd edək ki, yeniyetmə qəzada "Vaz" markalı avtomobillə toqquşan "Mercedes"in sürücüsü 47 yaşlı Tovuz rayon sakini Elmar Həsənovun oğludur. Sürücü və "Vaz" markalı avtomobildə olan 5 hərbçi hadisə yerində ölüblər.
