Gürcüstanda vəziyyət gərgin olaraq qalır. Modern.az xəbər verir ki, su şırnaqları ilə etirazçıları dağıdan polis qüvvələri paytaxtın Rustaveli prospektini zəbt edib.
Azadlıq meydanından hərəkətə başlayan polis su şırnaqlarını işə salaraq parlamentə bitişik əraziyə keçib. Təhlükəsizlik qüvvələri qaz kapsullarından, bibər qazından və digər vasitələrdən də istifadə edib.
Mitinq iştirakçıları polisin yaxınlaşmasını etiraz hayqırtıları ilə qarşılayıblar. Rustaveli prospektində vəziyyət gərgindir.
Su şırnaqlarından və qaz kapsullarından istifadə davam edir, lakin vətəndaşlar Tbilisi küçələrində qalır.
Gürcüstan Gənc Hüquqşünaslar Assosiasiyasının məlumatına görə, noyabrın 28-dən dekabrın 1-dək hüquqi yardım şəbəkəsinin qaynar xəttinə 200-dən çox şəxsin saxlanması barədə məlumat daxil olub. Onların sözlərinə görə, saxlanılanlar arasında qadınlar, jurnalistlər, mədəniyyət nümayəndələri, qeyri-hökumət təşkilatlarının əməkdaşları da var.
Gürcüstanda yeni etiraz dalğası noyabrın 28-də hakim “Gürcü arzusu”nun Avropa İttifaqına üzvlüklə bağlı müzakirələrin başlanmasını 2028-ci ilin sonuna qədər təxirə salmaq qərarından sonra başlayıb.
