Gəncə Şəhər Birləşmiş Xəstəxanasının təşkilatçılığı, Gəncə Şəhər İcra Hakimiyyətinin dəstəyi ilə Gəncə Dövlət Universitetində “Sağlam həyat tərzinin təbliği” mövzusunda tədbir təşkil edilib. Tədbirdə ilk əvvəl Azərbaycan Respublikasının Dövlət Himni səsləndirilib. Daha sonra torpaqlarımızın azadlığı və bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad edilib.
Modern.az xəbər verir ki, tədbirdə Gəncə Dövlət Universitetinin Humanitar məsələlər üzrə prorektoru Gülsüm Fətəliyeva narkomaniyanın cəmiyyət üçün yaratdığı ciddi təhlükələrdən və onun insan sağlamlığına vurduğu ağır zərərlərdən danışıb. Prorektor gənclərin sağlam həyat tərzini seçməsinin vacibliyini və milli-mənəvi dəyərlərə bağlılığın bu istiqamətdə mühüm rol oynadığını qeyd edib. Gülsüm Fətəliyeva sağlam cəmiyyətin formalaşmasında narkomaniya ilə mübarizənin önəmli rolundan danışıb və respublika miqyasında bu istiqamətdə ciddi və kompleks tədbirlərin həyata keçirildiyini bildirib.
Gəncə Şəhər Birləşmiş Xəstəxanasının direktor müavini Yalçın Babayev çıxışında narkotik vasitələrdən istifadənin insan həyatı üçün təhlükəsindən bəhs edib. Gənclərin bu istiqamətdə mütəmadi maarifləndirilməsinin vacibliyini bildirib. O, tələbələrə pis vərdişlərdən uzaq olmağı, onlara elm öyrənməyi, idmanla məşğul olmağı və digər faydalı işlərə maraq göstərməyi tövsiyə edib.
Gəncə Şəhər İcra Hakimiyyətinin nümayəndəsi Xalidə Mete çıxışda məişət zorakılığı mövzusuna toxunub. Bu cür hallarının qarşısının alınması üçün maarifləndirmə işinin gücləndirilməsinin dövlətimizin daxili siyasətində bu gün də ən mühüm prioritetlərdən biri olduğunu qeyd edib. Uşaq zorakılığı barədə danışıb və bu istiqamətdə görülən işlər barədə məlumat verib.
Abbas Səhhət adına xəstəxananın şöbə müdiri, həkim-terapevt Aysel Əliyeva isə müasir dövrdə gənclərin zərərli vərdişlərdən qorunmasının olduqca vacibliyindən danışıb. Tədbir iştirakçılarına sağlam həyat tərzinin əsas komponentləri haqqında məlumat verən Aysel Əliyeva yeniyetmə və gəncləri sağlam həyat tərzinin normalarına riayət etməyə və zərərli vərdişlərdən uzaq durmağa çağırıb.
Gəncə şəhər Narkoloji Dispanserin əməkdaşı Nurlana Rəhimova da narkotik vasitələrə yaranan asılılıqdan və ölkəmizdə narkomanlığa qarşı aparılan mübarizədən danışaraq, şəxsiyyətin formalaşması üçün cəmiyyətin nə qədər önəmli faktor olduğunu və bu sahədə ictimai maarifləndirmə işlərinin əhatəsinin genişləndirilməsinin vacibliyini diqqətə çatdırıb.
Gəncə Şəhər Birləşmiş Xəstəxanasının hüquqşünası Hadı Hüseynov ölkəmizdə məişət zorakılığı ilə bağlı mövcud vəziyyət, məişət zorakılığına qarşı mübarizə sahəsində atılan addımlar barədə ətraflı məlumatı tədbir iştirakçılarının diqqətinə çatdırıb. Qeyd edib ki, məişət zorakılığı həssas, ictimai, sosial bir mövzudur.
Sonda tələbələrin sualları cavablandırılıb, mövzu ətrafında müzakirələr aparılıb.
