ABŞ-nin Azərbaycandakı səfirliyi bir müddət əvvəl Azərbaycan əleyhinə paylaşım edib. Həmin paylaşımla bağlı Azərbaycan Xarici İşlər Nazirliyinin Mətbuat xidməti idarəsinin rəisi Ayxan Hacızadə ABŞ səfirliyinə cavab verməli olub. "ABŞ-nin indiki administrasiyası bütün vasitələrlə Azərbaycanla münasibətlərinə xələl gətirmək məqsədini güdür.ABŞ-nin Azərbaycandakı səfirliyinin bütün bunları və əvvəlki təxribat xarakterli şərhlərini ifadə etmək üçün, özünü ifadə azadlığının müdafiəçisi kimi təqdim edən ABŞ tərəfinin media azadlığına qarşı dözümsüzlüyü heyrət doğurur.Görünür, ABŞ-nin indiki administrasiyası bütün vasitələrlə xarici əlaqələrinə, xüsusən də Azərbaycanla münasibətlərinə xələl gətirmək məqsədini güdür, xəyali və mifik iddialar üzərində dayanır", - A.Hacızadə deyib.
Modern.az-a danışan Milli Məclisin Azərbaycan-ABŞ Parlamentlərarası İşçi Qrupunun sədri Səməd Seyidov ABŞ-nin ölkəmizdəki səfirliyinin sosial şəbəkədəki paylaşımını çox pis qiymətləndirdiyini bildirib:
“Ümumiyyətlə belə payaşımlar, bu şəkildə müdaxilələr diplomatik etiket və qayda-qanunlara normal münasibət bəsləməməkdən irəli gəlir. Hesab edirəm ki, belə məlumatları real, düzgün olmadığı, həqiqəti əks etdirmədiyi halda sosial şəbəkələrdə paylaşmaq ABŞ-Azərbaycan münasibətlərinə zərbə vurmaqdan başqa bir şey deyil. Çox təəssüflər olsun ki, Bayden administrasiyası ABŞ-Azərbaycan münasibətlərinin pozulması üçün əllərindən gələni edib. Yəqin ki, gedə-getdə bunlar bu istiqamətdə sonuncu addımlarını da atmaqdadırlar”.
S.Seyidov yeni administrasiyanın indiyə qədər olanlardan nəticə çıxaracağına əmin olduğunu qeyd edib:
“Ümid edirik ki, yeni administrasiya hakimiyyətə gəldikdən, yəni yanvarın axırından sonra belə hadisələrə, hərəkətlərə düzgün qiymət veriləcək. Səfirliklərə də fəaliyyətləri ilə əlaqədar düzgün istiqamət veriləcək. Ona görə ki, səfirliklərin vəzifəsi ölkələrarası beynəlxalq münasibətləri inkişaf etdirməkdir, daha ölkənin daxili işlərinə qarışmaq yox. Hesab edirəm ki, bizim bu istiqamətdə apardığımız siyasət Blinken-Bayden cütlüyü ilə ABŞ-Azərbaycan münasibətlərinə ciddi problemlər yaradırdı. Ona görə ki, bizim siyasətimiz həqiqəti əks etdirirdi. Blinken-Bayden siyasəti isə birtərəfli, ermənipərəst, Azərbaycanın yaratdığı yeni reallığa tamam başqa gözlə baxan siyasət idi. Əminəm ki, yeni administariya bundan nəticələr çıxaracaq”.
