“Cənab Prezidentin idmançılarımızla görüşü xüsusi əhəmiyyət daşıyır. Azərbaycan idmançıları da bundan ruhlanaraq ölkəmizi layiqincə təmsil etməyə davam edəcəklər”.

Modern.az xəbər verir ki, bu fikirləri Milli Məclisin deputatı Ceyhun Məmmədov Prezident İlham Əliyevin idmançılarla görüşündən danışarkən qeyd edib.

C.Məmmədov deyib ki, Prezident İlham Əliyevin uğurla davam etdirdiyi siyasət nəticəsində ölkəmiz bir çox sahələrdə regionun lider dövlətinə çevrilib:

“Dövlətimizin gücünün ildən-ilə artması idmanımızın inkişafına da müsbət təsir göstərib. Nəinki paytaxtımızda, eləcə də regionlarda bir çox Olimpiya kompleksləri, müasir idman qurğuları istifadəyə verilib, maddi-texniki baza möhkəmləndirilib. Bütün bu işlər, əlbəttə ki, idmançılarımızın yerli və beynəlxalq turnirlərdə uğur qazanmalarında müstəsna rol oynayıb.
Biz cənab Prezidentin həyata keçirdiyi siyasətə baxanda, ədalət prinsipinin əsas yer tutduğunu görürük. Həm ölkəmizə qarşı ədalətsizliyə, həm dünyadakı ədalətsizliyə qarşı cənab Prezident öz mövqeyini ortaya qoyub”.

Deputat deyib ki, Azərbaycan Respublikasının ərazi bütövlüyünü bərpa etməsi hər kəsdə qürur hissi yaradıb. Eyni zamanda bu qələbə hər bir Azərbaycan gənci üçün stimul olub:

“Biz döyüş meydanındakı qələbəmizi idmanda da, təhsildə də davam etdirməliyik. Bizim qalib xalq olduğumuzu artıq bütün dünya qəbul edir.

Bu gün Azərbaycan idmançıları ölkəmizi ləyaqətlə təmsil edir. Hesab edirəm ki, cənab Prezidentin idmançılarımızla görüşü xüsusi əhəmiyyət daşıyır. Cənab Prezidentin bu cür tədbirlərdə iştirakı və idmançıları mükafatlandırması çox önəmlidir. Şübhəsiz ki, Azərbaycan idmançıları da bundan ruhlanaraq ölkəmizi layiqincə təmsil etməyə davam edəcəklər”.

“Cənab Prezident idmançılarla görüşdə gələn il Azərbaycanın növbəti böyük idman yarışına -  MDB oyunlarına ev sahibliyi edəcəyini bildirdi. Ümumilikdə bu oyunların 14 şəhərdə keçirilməsi nəzərdə tutulub. 7 min idmançının iştirakı gözlənilən üçüncü MDB oyunlarının mərkəzi kimi Gəncə şəhəri seçilib. Gəncədə yeni stadion inşa edilir və oyunlara qədər hazır olacaq. Eyni zamanda, bir neçə ay bundan əvvəl Gəncədə ölkəmizin böyük Olimpiya İdman Kompleksi açılıb. Əminik ki, idmançılarımız dövlət başçımızın yaratdığı bu şəraiti layiqli qiymətləndirərək, yaxşı nəticələr göstərəcəklər”, - millət vəkili əlavə edib.

C.Məmmədov xatırladıb ki, hazırda Azərbaycanın bölgələrin 44 Olimpiya İdman Kompleksi fəaliyyət göstərir:

“Azərbaycanda mötəbər Avropa Oyunları keçirilıb, ölkəmizin İslam Həmrəylik oyunlarına, COP29 beynəlxalq iqlim konfransına da Azərbaycanın necə yüksək səviyyədə ev sahibliyi etməsinə bütün dünya şahid oldu. İnanırıq ki, bu dəfə də Azərbaycan üçüncü MDB oyunlarının yüksək şəkildə təşkili üçün çalışacaq və idmançılarımız ölkəmizi ləyaqətlə təmsil edərək bizləri sevindirəcək. Prezident ­İlham Əliyevin idmanın inkişafı üçün göstərdiyi səylər və qəbul etdiyi qərarlar belə deməyə əsas verir ki, qarşıdakı illərdə də Azərbaycan idmanı yeni zirvələri fəth edəcək və idmanın kütləviləşməsi prosesi özünün inkişafında yeni mərhələyə qədəm qoyacaqdır”.