Suriyada Əsədə rejimin çökməsi ilə Suriya xalqı üçün yeni bir dövr başlayır. Əsəd rejiminin süqut etməsi ilə ölkədə geniş miqyaslı dəyişikliklər baş verir. Bu açıqlama silahlı qruplaşmaların Dəməşqi nəzarətə götürməsi və hökumət qüvvələrinin geri çəkilməsi fonunda gəldi.

Suriya xalqı üçün bu hadisələr ölkədə 61 illik avtoritar idarəetmənin sona çatdığını və demokratik bir gələcəyə doğru ümidlərin artdığını göstərir. Ekspertlər hesab edir ki, bu dəyişikliklər Suriyada həm daxili, həm də beynəlxalq səviyyədə ciddi təsirlər yaradacaq.

Bəs ölkədəki Rusiya hərbi bazalarının taleyi necə olacaq?

Modern.az mövzu ilə bağlı türkiyəli təhlükəsizlik eksperti Ali Burak Darıcılı ilə həmsöhbət olub.

HTŞ Şama girdikdən sonra İsrail ordusu Suriyada ağır hava hücumları həyata keçirdi:

“Bunun səbəbi Suriyanın hərbi təchizatlarını, hərbi hissələrini məhv etmək, yeni hakimiyyətə Suriyanın hərbi gücünü tamamilə yaxud böyük ölçüdə dağıdılmış olaraq vermək məqsədi idi. Buna böyük əhəmiyyətli dərəcədə də nail oldular. Oradakı hərbi təchizatın terrorçu qruplaşmaların əlinə keçməsi riski hər zaman mövcuddur. Bəzi silahların radikal qrupların əlinə keçmədiyini tam əminliklə deyə bilmərik. Biz bunun bir nümunəsini Əfqanıstanda yaşamışıq. Sovet işğalı zamanı Əfqan mücahidlərin ABŞ tərəfindən verilən FIM-92 Stinger raketləri var idi. Daha sonra həmin raketlərlə Əl-Qaidə tərəfindən qərbdə mülki təyyarələrə hücumlar həyata keçirildi. Amerikalılar bundan sonra həmin silahları toplamağa məcbur oldular. Suriyadakı bazalarda olan silahlar da hansısa yolla radikal qrupların əlinə keçsə və hücum həyata keçiriləcək ölkəyə soxulsa bu böyük problem olaraq qarşımıza çıxa bilər. Hökumət bu ehtimalı minimuma endirməyə çalışdı, böyük ölçüdə də bacardı. Amma tamamilə bacardığını demək çox iddialı olar, bunu iddia edə bilmərik”.

Ekspert bildirib ki, Rusiyanın Suriyada bir hava və bir dəniz bazasında hərbi qüvvəsi mövcuddur:

“Mediada Suriyanın içərilərində olan qüvvələrin Türkiyənin qarant rol oynaması ilə çəkildiyi bildirilir. Rusiyanın yeni hökumətdən tələbi həmin hərbi bazaların statusunun rəsmiləşdirilməsidir. Amma ABŞ buna mane olmağa çalışacaq. İran üçün isə vəziyyət daha da acınacaqlıdır. Tehran HTŞ-nin irəliləyişində itirən tərəfdir. Suriyada nüfuzunu itirdi, qüvvələrini geriyə çəkməyə məcbur oldu. Bunun İran üçün bir təsiri də Livandakı Hizbullah qüvvələri cəhətdən olacaq. Həmin qüvvələrin loistikası və silah yardımları demək olar ki, tamamilə Suriya üzərindən Livana çatdırılırdı. İndi Livana da bu yardımlar getməyəcək, dolayısıyla Livan Hizbullahı da gələcək zamanda çox çətin vəziyyətdə qalacaq”.