Rusiya Federasiyasının qanunvericiliyinə edilən dəyişikliklərlə, 1 yanvar 2025-ci ildən etibarən əcnəbilərin Rusiya ərazisində müvəqqəti yaşama müddəti il ərzində cəmi 90 gün olacaq. Qeyd edək ki, əvvəllər bu müddət 180 gün olub.
Qərar Azərbaycan vətəndaşlarına da şamil edilib.
Modern.az-a danışan Milli Məclisin deputatı Elman Nəsirov bildirib ki, Rusiyanın miqrantlarla bağlı siyasətinin iki tərəfi var:
“Bu tərəflər bir-birinə ziddiyyət təşkil edir. Birincisi Rusiya bu addımı atmaqla dövlətin maraqlarını nəzərə aldığını düşünür. İl ərzində ölkədə qalma müddətini 180 gündən 90 günə endirilib. Eyni zamanda Rusiyada yaşayan miqrantların uşaqlarının rus dilindən imtahan verməsi tələbi irəli sürülüb. Belə ki, uşaqlar imtahandan keçə bilməsələr, ölkədə təhsil almaqlarına icazə verilməyəcək. Rusiya bu kimi sərt addımlar atır. Amma Rusiyanı miqrantlarsız təsəvvür etmək çətindir. Miqrantların yoxluğu ölkənin iqtisadiyyatına, ticarət balansına, ayrı-ayrı strukturlarının fəaliyyətində ciddi problemlər yarada bilər. Hesab edirəm ki, atılan addımların dövlət maraqlarına ziddiyyət təşkil edən məqamı bununla bağlıdır. Miqrantlarsız Rusiyaya çox çətin olar, hesab edirəm ki, bunu onlar da anlayır. Amma bir çox hallarda situativ addımlar da atılır”.
Millət vəkili qeyd edib ki, Azərbaycan təyyarəsinin vurulması ilə bağlı Rusiyaya qarşı əsaslı tam əsaslı, faktlara, arqumentlərə söykənən ittihamlarımız var:
“Bunun ardınca Rusiyanın belə bir addım atması əslində anlaşılmazdır. Bu məsələyə qlobal deyil, qlobal çərçivədə yanaşmaq cəhdidir. Eyni zamanda bilirik ki, Azərbaycan dövləti də bu istiqamətdə müvafiq addımlar atıb. Nazirlər Kabinetinin müvafiq qərarı ilə Rusiya vətəndaşlarının il ərzində ölkədəki fəaliyyət müddəti 180 gündən 90 günə endirilib. Bu Azərbaycanın indiki reallıqda atdığı ən düzgün addımdır. Hesab edirəm ki, Rusiya fərqində olmalıdır ki, Azərbaycan Rusiya ilə strateji müttəfiqdir, müttəfiq dövlətə qarşı belə bir yanaşma və davranış ümumiyyətlə anlaşılmazdır. Təyyarə qəzasının baş verməsində də Rusiyanın hərbi və mülki strukturları arasında anlaşılmazlıq və koordinasiyanın olmaması faktı üzə çıxır. Mənə elə gəlir ki, miqrasiya məsələləri ilə bağlı məsələləri təhlil edərkən bu reallıqları yaddan çıxarmamalıyıq. Rusiyanın müəyyən qurumları arasındakı koordinasiyasızlıq təəccüb doğurur”.
