İş yoldaşları ilə birlikdə əməliyyat zamanı doğum gününü qeyd edən "German Hospital"ın cərrah mama-ginekoloqu Ləman Əliyeva ilə bağlı qərar verilib.

Modern.az xəbər verir ki, bununla bağlı "German hospital"ın direktor müavini Səftər Əliyev Oxu.Az-a açıqlamasında bildirib.

"Dünən kütləvi informasiya vasitələrində məlum video yayılandan sonra dərhal müəssisə rəhbərliyi tərəfindən beş nəfərdən ibarət komissiya yaradıldı və aparılan araşdırmalardan sonra məlum oldu ki, həmin videoda görüntülənən əməkdaşlar kiçik tibb bacılarıdır. Dərhal onlar kadrlar şöbəsinə dəvət olundular, izahatları alındı, barələrində rəsmi qaydada töhmət elan olundu. Həmçinin həkim-ginekoloq Ləman Əliyeva araşdırmalar tam yekunlaşana qədər işdən kənarlaşdırıldı. Yəni bütün bu araşdırmalar tam yekunlaşdırılıb, qərarlar qəbul ediləndən sonra müəyyən olunacaq ki, həkimlə əməkdaşlığımızı davam etdirəcəyik, yoxsa yox?" - deyə S.Əliyev bildirib.

"Bununla paralel olaraq Səhiyyə Nazirliyi Analitik Ekspertiza Mərkəzi (AEM) bizim müəssisəyə plandankənar yoxlama açdı və bu gün biz bütün sənədləri onlara təqdim edəcəyik. Onlar bizim əməkdaşlarla görüşlər keçirdilər, profilaktiki söhbətlər apardılar, nizam-intizam qaydalarının pozulması barədə məlumat verdilər. Artıq növbəti qərarları Səhiyyə Nazirliyinin Analitik Ekspertiza Mərkəzi qəbul edəcək", - deyə direktor müavini əlavə edib.

 

***

16:12

Bakı yerləşən özəl xəstəxanlardan birində həkim əməliyyat zamanı doğum gününü qeyd edib. Hadisə "German Hospital"da baş verib. Əməliyyat zamanı doğum günü qeyd edilən həkim xəstəxananın cərrah mama-ginekoloqu Ləman Əliyeva olub.

Məsələ ilə bağlı araşdırma aparılır. Görüntülər sosial şəbəkələrdə müzakirələrə səbəb olub.

Mövzu ilə bağlı Modern.az-a danışan Milli Məclisin Səhiyyə komitəsinin üzvü Müşfiq Məmmədli bildirib ki, həkimlər çətin peşə sahibləri kimi təbii ki, diqqət göstərilməyə və öz iş yerlərində normal atmosfer yaratmaq kimi haqlara malikdirlər:

“Amma bir məsələ vardır ki, həkim deontologiyası, tibb müəssisəsini daxili nizam intizam qaydaları vardır. İstər dövlət istərsə də özəl tibb müəssisəsində əməliyyatxanaya daxil olmaqla bağlı məhdudiyyətlər nəzərə alındıqda bu görüntülər təbii ki, xoş mənzərə deyil. Üstəgəl xəstənin görüntüsünün paylaşılmaması kimi həkimlərin üzərinə götürdüyü öhdəlik var. Məncə, bunlar normal görüntülər deyil, hər halda bu görüntülər tibb müəssisəsində yolverilən görüntülər deyil”.