Prezident Rəcəb Tayyib Ərdoğanın liderliyi ilə Türkiyə müharibə, böhran və münaqişələrin qarşısını almaq uğrunda səylərini ortaya qoyur, tərəflər arasında körpü qurur, şiddət yerinə diplomatiyanın gücünü təlqin edir. 

Modern.az xəbər verir ki, bu fikirləri Şimali Kipr Türk Respublikasının (ŞKTR) Prezidenti Ersin Tatar bu ölkədə işgüzar səfərdə olan Türkiyənin xarici işlər naziri Hakan Fidan ilə birgə keçirdiyi mətbuat konfransında səsləndirib. 

İkili standartlar, ədalətsizlik fonunda Şimali Kipri hər zaman dəstəklədiyinə görə Türkiyəyə təşəkkür və minnətdarlığını ifadə edən Ersin Tatar 41 ildir öz müstəqilliyinə qovuşan ölkəsinin mübarizəsini axıradək davam etdirəcəyini də deyib. 

“Mart ayında İsveçrədə keçiriləcək qeyri-rəsmi toplantının böyük əhəmiyyəti var. Bu görüşdə Kipr adasının gələcəyi üçün atılacaq növbəti addımlar müzakirə olunacaq. Biz bu görüşə iki tərəfin münasibətlərinin, o cümlədən əməkdaşlıq sahələrinin necə tənzimlənə biləcəyini, eləcə də yarana biləcək böhranların sülh yolu ilə, məsləhətləşmə və dialoq çərçivəsində, sülh yolu ilə necə həll oluna biləcəyini danışmaq üçün gedəcəyik”, - deyə o bildirib.

Səadət Hakıyeva