Səudiyyə Ərəbistanının Şura Məclisinin sədri Şeyx Məhəmməd bin Abdulla əl Aş-Şeyxin dəvəti ilə Qafqaz Müsəlmanları İdarəsinin sədri Şeyxülislam Allahşükür Paşazadə və onu müşayiət edən nümayəndə heyətinin üzvləri - Azərbaycan Respublikası Milli Məclisinin deputatları Səməd Seyidov, Fazil Mustafa, Cavanşir Paşazadə və Rəşad Mahmudov Səudiyyə Ərəbistanında səfərdədirlər.
QMİ sədri A. Paşazadə və nümayəndə heyətinin üzvləri yanvarın 8-də İslam Əməkdaşlıq Təşkilatının Ciddə şəhərində yerləşən mənzil-qərargahında qurumun Baş katibi Hüsseyin Brahim Taha ilə görüşüblər.
Modern.az xəbər verir ki, görüşdə Şeyxülislam A.Paşazadə Azərbaycan Respublikasının Prezidenti İlham Əliyevin salamlarını İƏT Baş katibinə çatdırıb.Səmimi qəbula görə təşəkkürünü bildirən Şeyxulislam A.Paşazadə Azərbaycan Respublikasının 1991-ci ildə - hələ Sovet İttifaqı dağılmamışdan əvvəl İƏT-in üzvü olduğunu diqqətə çatdıraraq bildirib ki, Ulu Öndər Heydər Əliyevin əsasını qoyduğu bu əlaqələr daim inkişaf edib və bundan sonra da yüksələn xətlə davam edəcəkdir.
Azərbaycan Respublikası Milli Məclisinin Beynəlxalq münasibətlər və parlamentlərarası əlaqələr komitəsinin sədri Səməd Seyidov Azərbaycan ərazilərinin Ermənistan Respublikası tərəfindən işğalı dönəmində, Vətən müharibəsi vaxtında, o cümlədən müharibədən sonrakı müddət ərzində Azərbaycan Respublikasının haqlı mübarizəsində İƏT Baş katibliyinin və üzv dövlətlərin dəstəyinin yüksək qiymətləndirildiyini, eyni zamanda, sözügedən münaqişə ilə bağlı Təşkilatın qəbul etdiyi qətnamə və bəyanatların böyük əhəmiyyət daşıdığını vurğulayıb.
Azərbaycan Respublikası Milli Məclisinin İctimai birliklər və dini qurumlar komitəsinin sədri Fazil Mustafa Azərbaycan Respublikasında ölkə rəhbərliyinin İslam dininə verdiyi ali dəyərdən bəhs edərək Azərbaycanda digər dinlərin nümayəndələri üçün yaradılmış şəraitdən bəhs edib. Azərbaycanla İƏT arasındakı əlaqələrdən bəhs edən F.Mustafa ölkəmizin müstəqillik qazandığı ilk gündən etibarən İƏT-lə münasibətlərə xüsusi diqqət ayırdığını xüsusi qeyd edib. Prezident İlham Əliyevin müdrik dövlətçilik siyasəti sayəsində Respublikamızın bütün sahələrdə yüksək nailiyyətlər əldə etməsini xüsusi vurğulayan F. Mustafa Azərbaycanda dini sahədə yüksək səviyyədə tolerantlığın hökm sürməsinin dövlət başçısının siyasi xəttinin və dini lider Şeyxülislam A.Paşazadənin əməli fəaliyyətinin nəticəsi olduğunu diqqətə çatdırıb.
Azərbaycan Respublikası Milli Məclisinin Islam Əməkdaşlıq Təşkilatı Parlament İttifaqındakı nümayəndə heyətinin üzvü, İctimai birliklər və dini qurumlar komitəsinin üzvü Cavanşir Paşazadə Xocalı qətliamının dünyada tanıdılmasında İƏT-in rolunu yüksək dəyərləndirərək, beynəlxalq müstəvidə ədalətin təmin olunması yönündə fəaliyyətini xüsusi qeyd edib. Hazırda beynəlxalq təşkilatların əksəriyyətinin böhran keçirdiyini ifadə edən natiq İƏT-in Azərbaycanla bağlı qəbul etdiyi qətnamələrlə nümunəvi, örnək davranış sərgilədiyini bildirib.
Azərbaycan Respublikası Milli Məclisinin Səhiyyə komitəsi sədrinin müavini Rəşad Mahmudov, öz növbəsində, Azərbaycan Hava Yollarına məxsus təyyarənin qəzaya uğraması ilə əlaqədar İƏT Baş katibinin Azərbaycan Respublikasının Prezidentinə və xalqına başsağlığı verməsinin və İƏT tərəfindən hər zaman ölkəmizin haqlı mövqeyini dəstəkləyən bəyanatların verilməsinin yüksək qiymətləndirildiyi ifadə edilib.
Görüş zamanı parlament diplomatiyası haqqında fikirlər səsləndirilib və İƏT Parlament Assambleyası çərçivəsində ölkəmizin həyata keçirdiyi işlər diqqətə çatdırılıb.
Şeyxülislam A. Paşazadə 5-6 noyabr 2024-cü il tarixlərində Azərbaycan Respublikasının Prezidenti Zati-aliləri İlham Əliyevin təşəbbüsü və himayədarlıği ilə Birləşmiş Millətlər Təşkilatının İqlim Dəyişikliyi Konfransı (COP 29) çərçivəsində Qafqaz Müsəlmanları İdarəsinin Azərbaycan Respublikasının Ekologiya və Təbii sərvətlər Nazirliyi, Dini qurumlarla iş üzrə Dövlət Komitəsi, Beynəlxalq Müsəlman Ağsaqqallar Şurası və BMT-nin Ətraf mühit Proqramı ilə həmtəşkilatçılıqda Dini Liderlərin Qlobal Bakı Sammitini keçirildiyini və İƏT Baş katibinin müavinin həmin tədbirdə yaxından iştirakını məmnuniyyətlə qeyd edib.
İƏT Baş katibi Qafqaz Müsəlmanları İdarəsinin sədri Şeyxülislam Allahşükür Paşazadə və onu müşayiət edən nümayəndə heyətini Təşkilatın baş qərargahında görməkdən məmnun olduğunu bildirib. H.B.Taha Azərbaycanın mövqeyini daima dəstəklədiklərini qeyd edərək COP29 tədbirinin Azərbaycan tərəfindən uğurla keçirildiyini və sözügedən tədbirdə iştirakdan məmnun olduğunu vurğulayıb. Azərbaycan Prezidenti ilə görüşünü məmnunluqla xatırlayan H.B.Taha Azərbaycan-İƏT əlaqələrinin daha da dərinləşməsinin prioritet istiqamət olduğunu diqqətə çatdırıb. Şuşa şəhərinə səfərinin onda olduqca dərin təəssürat buraxdığını bildirən Baş katib H.B.Taha Qarabağda erməni vəhşiliyinin izlərinin dəhşətli olduğunu ifadə edib. İƏT-in Azərbaycan Respublikası ilə birlikdə keçirdiyi nazirlər iclaslarının səmərəli əməkdaşlığın möhkəmlənməsinə xüsusi təsir göstərdiyini ifadə edən H.B.Taha 2026-cı ildə İƏT Dövlət və Hökümət başçılarının 16-cı Sammitinin ölkəmizdə keçirilməsinin İƏT dövlətlərinin Azərbaycana etimadının göstərici olduğunu vurğulayıb.
İƏT Baş katibliyin Siyasi idarəsinin rəisi səfir Məhəmməd Salah Tekaya çıxış edərək Azərbaycan İƏT əlaqələrinin inkişafından bəhs edib, Azərbaycan-İƏT əlaqələrinin bütün İslam dünyası üçün nümunəvi səciyyə daşıdığına diqqəti çəkən İƏT rəsmisi Azərbaycan Respublikasının Təşkilata göstərdiyi maddi və mənəvi yardımları xüsusən vurğulayıb.
Şeyxülislam A.Paşazadə BMT-nin Sivilizasiyalar Alyansı və İƏT-in həmtəşkilatçılığı ilə, o cümlədən, İƏT ölkələrinin fəal iştirakı ilə İslamofobiya, dini azadlıqlar, tolerantlığı özündə ehtiva edən konfransın 2026-cı il İƏT Dövlət və Hökümət başçılarının 16-cı Sammiti öncəsi Azərbaycan Respublikasında keçirilməsini təklif edib və Təşkilatın sözügedən konfransda fəal iştirakının vacibliyini vurğulayaraq, bu tədbirlə bağlı İƏT-in dəstəyinin xüsusi əhəmiyyət kəsb etdiyini diqqətə çatdırıb.
Baş katib ifadə edib ki, dünyada mövcud münaqişələrin həllində din xadimlərinin mənəvi nüfuz və rolu əsas resurslardan biridir. Baş katib sözügedən tədbirin keçirilməsində İƏT-in həmtəşkilatçı olması məsələsi ilə bağlı Azərbaycan tərəfindən müraciət alındıqdan sonra müvafiq araşdırmalar aparılaraq qərar veriləcəyini bildirib.
Görüşün sonunda İƏT baş katibi Şeyxülislam həzrətlərindən Azərbaycan Prezidenti İlham Əliyevə səmimi salamlarını çatdırmasını xahiş edib. Şeyxülislam görüş zamanı İƏT Baş katibini Azərbaycan Respublikasına səfərə dəvət edib.
Azərbaycan Respublikasının SƏK-dəki səfirliyinin müşaviri Yadulla Paşayev görüşdə iştirak edib.
Qafqaz Müsəlmanları İdarəsinin sədri Şeyxülislam Allahşükür Paşazadə və onu müşayiət edən nümayəndə heyətinin Səudiyyə Ərəbistanına səfəri davam edir.
