Bakı Mühəndislik Universitetinin (BMU) rektoru Yaqub Piriyev BMT-nin İqlim Dəyişmələri üzrə Çərçivə Konvensiyasının Tərəflər Konfransında (COP29) iştirak edən könüllü tələbələrlə görüşüb.
Modern.az xəbər verir ki, rektor bu mötəbər beynəlxalq tədbirdə uğurlu könüllülük fəaliyyətlərinə görə Prezident İlham Əliyev tərəfindən Təşəkkürnamə ilə təltif edilən BMU tələbələrinə səmimi təbriklərini çatdırıb, onların fəaliyyətinin yüksək qiymətləndirilməsinin universitet üçün də qürurverici olduğunu bildirib.
BMU-nun 76 tələbəsinə COP29-dakı fəal iştirakı ilə bağlı göstərilən diqqəti böyük etimad adlandıran rektor müəllim-tələbə heyəti adından ölkə Prezidentinə təşəkkür edib. Eyni zamanda müstəqillik tariximizdə ən böyük beynəlxalq tədbirə qısa müddətdə hazırlaşmağa rəğmən Azərbaycanın layiqli evsahibliyini, eləcə də 197 ölkə, 80 dövlət və hökumət başçısı, vitse-prezident, ümumilikdə isə 76 min iştirakçının konfransa qatılmasını ölkəmiz üçün mühüm nailiyyət adlandırıb.
Gənclərin belə tədbirlərdə iştiraklarının onların inkişafına müsbət təsirlərindən danışan rektor könüllülük fəaliyyətinin tələbələrə dəyərli təcrübə qazandırdığını, həmçinin onların yeni əlaqələr qurmasına şərait yaratdığını vurğulayıb. Yaqub Piriyev bu baxımdan tələbələri gələcəkdə də dövlət əhəmiyyətli tədbirlərdə fəal iştirak etməyə, ölkəmizin maraqlarını qorumağa, Azərbaycanın adını hər zaman uca tutmağa çağırıb.
Görüşdə COP29-la bağlı təəssüratlarını bölüşən tələbələr ölkəmizdə belə bir möhtəşəm tədbirin təşkili və konfransdakı fəaliyyətlərinə yüksək dəyər verdiyi üçün Prezident İlham Əliyevə dərin minnətdarlıqlarını ifadə ediblər.
