Ermənistanın baş naziri Nikol Paşinyan bir müddət öncə ölkənin İctimai televiziyasına müsahibə verib. Bu zaman o, erməni separatçılarının Bakıdakı məhkəməsi barədə danışıb.

"Bakıdakı prosesdən Ermənistan Respublikasına qarşı istifadə olunacaq. Deyirsən ki, biz onların orda olmasına şadıq? Onlardan Ermənistan Respublikası əleyhinə sübutlar çıxarmaq üçün orada psixotrop dərmanlardan istifadə olunacaq. Əlimizdə kəşfiyyat məlumatları var ki, bu dərmanlar və ifadələr Ermənistana qarşı istifadə olunacaq. Siyasi rəqiblərimizin Bakıda həbsdə olmasına sevindiyimizi deyirsiniz? Bu necə ağlınıza gələ bilər? Biz onları azad etmək üçün öz resurslarımızdan istifadə edirik. Dünyanın bir çox güclü dövlətləri oxşar problemlərlə üzləşə bilər və hər şeyi bir anda həll etmək mümkün deyil",-Paşinyan deyib.

Şübhəsiz ki, Paşinyan bu çıxışı ilə gələcəkdə qondarma "Artsaxın keçmiş başçısı" Arayik Arutunyanın və ya digər separatçıların açıqlayacağı faktlardan sığortalamağa çalışır.

Məsələ ilə bağlı Modern.az-a danışan Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Aydın Mirzəzadə bildirib ki, Paşinyanın bəyanatı olduqca qeyri-ciddidir:

"İş burasındadır ki, Paşinyan nə buradakı erməni separatçılarının mühafizəsində iştirak edir, nə də həkim kimi onların vaxtaşırı vəziyyətinin qiymətləndirir. Separatçıların məhkəmə zamanı davranışları, verdiyi cavablar onların kifayət qədər normal, anlaqlı, hərəkətlərindən məsuliyyətli olduğunu göstərir. Söhbət başqa şeydən gedir. Separatçıların artıq ilk bəyanatlarından onların Azərbaycanın Qarabağ bölgəsindəki keçmiş rejimin rəsmi İrəvan tərəfindən yaradıldığı, maliyyələşdirildiyi, bütün məsələlərin Ermənistan paytaxtından idarə edildiyi görünür. Bu isə İrəvanın yalanlarını ifşa edir. Paşinyan  bir qayda olaraq, Azərbaycanın problemi İrəvanla deyil, Xankəndi ilə həll etməsini vurğulayırdı. Məhkəmədə separatçıların ilkin bəyanatları göstərir ki, Paşinyan Azərbaycanın torpaqlarının işğalını möhkəmləndirmək məsələsində sələflərindən geri qalmayıb. Və özünün yaratdığı sülh göyərçini obrazı darmadağın olmağa başlayır. O, əslində bir daha qonşu dövlətlərin torpaqlarının işğalını möhkəmləndirməyə çalışan çox uğursuz siyasətçi obrazında görünməyə başlayır. Eyni zamanda Azərbaycanla apardığı danışıqlarda o, işğal edilmiş ərazilərdə baş verən qanunsuzluqlardan kənar durmağa çalışır". 

A.Mirzəzadə vurğulayıb ki, Ermənistanın Azərbaycanla münasibətlərində axıra qədər səmimi olması yaxşı olardı:

"Yaxşı olardı ki, Ermənistan cinayətlərini etiraf etmək üçün özündə güc tapaydı, Azərbaycanla bundan sonrakı münasibətlərinə yeni bir ağ səhifədən başlamağı bacaraydı. Ancaq görünür, hələ də bu siyasi cəsarət Ermənistan liderlərində yoxdur. Ona görə də Ermənistanın ayrı-ayrı şəxslərindən, o cümlədən ölkənin birinci şəxsi tərəfindən vaxtaşırı belə qeyri-ciddi bəyanatlar eşitməli oluruq".