Ermənistan Milli Təhlükəsizlik Xidməti yanvarın 30-da İrəvanın Respublika meydanında bir qrup şəxs tərəfindən “Qarabağ” mahnısının ifa olunmasını əks etdirən videogörüntüyə münasibət bildirib.
Modern.az xəbər verir ki, Milli Təhlükəsizlik Xidmətinin məlumatına görə, həmin şəxslər iranlıdırlar. Qurum “Qarabağ” mahnısının yüksək səslə oxunmasını əks etdirən videonun alt yazılarında həmin şəxslərin azərbaycanlı olduğunun qeyd edilməsi həqiqəti əks etdirmir.
“Yanvarın 30-da axşam saatlarında internetdə geniş yayılan video ilə əlaqədar aydınlaşdırılıb ki, videoda təsvir olunan şəxslər əslində İran İslam Respublikasının vətəndaşlarıdır. Həmin şəxslər 2024-cü il dekabrın 30-dan bu il yanvarın 3-dək Ermənistan Respublikasında olublar.
Milli Təhlükəsizlik Xidməti insanları etibarsız və yoxlanılmamış məlumat və şərhləri dərc etməkdən çəkinməyə çağırır”, - deyə məlumatda bildirilir.
Ermənistan KİV-də və sosial şəbəkələrdə videodan narahatlıq ifadə olunub və İrəvanın baş meydanında “Qarabağ” mahnısının ifa edilməsi açıq-aşkar təxribat yaratmaq cəhdi kimi qiymətləndirilib.
