44 günlük Vətən müharibəsinin şəhidi Türkman Yolçu oğlu Məmmədovun ailəsinin Sabunçu rayonunda yaşadığı evin yolu bərbad vəziyyətdədir.

Modern.az-ın məlumatına görə, bunu şəhidin qohumları sosial şəbəkədə bildiriblər. Onlar şəhid ailəsinin diqqətdən kənarda qalmasından şikayətləniblər.

“Çox təəssüf ki, Türkmanın ailəsi diqqətdən kənarda qalıb. Müraciət etmədiyimiz yer qalmayıb. Onların evi muzey kimidi, bura gələn yol çox pis haldadır, 300-400 metr asfaltlama işi lazımdır”, - deyə şəhidin qohumları sosial şəbəkədə kömək istəyiblər.

Türkman Məmmədov 28 sentyabr 1998-ci il tarixində Gədəbəy rayonunun Hacılar kəndində anadan olub. Sonra ailəsi ilə birgə Bakıya – Sabunçu rayonuna köçüblər. Orta təhsilini Sabunçu rayonunda yerləşən 22 saylı Cəbrayıl köçkün məktəbində alıb. Daha Bakıxanov qəsəbəsində yerləşən 17 saylı Texniki peşə məktəbində oxuyub. Peşə məktəbini bitirəndən sonra hərbi xidmətə çağırılıb. 2019-cu ildə Hava Hücumundan Müdafiə Qoşunları bölməsində atıcı-zenitçi kimi xidmət edib. 27 sentyabr 2020-ci il tarixində başlayan Vətən müharibəsində Füzuli, Cəbrayıl və Xocavənd rayonun kəndlərinin azad olunmasında iştirak edib.
27 oktyabr 2020-ci ildə döyüşlərdə şəhid olub.
Azərbaycan Prezidentinin sərəncamlaı ilə Türkman Məmmədov ölümündən sonra "Vətən uğrunda","Füzulinin azad olunmasına görə", "Xocavəndin azad olunmasına görə", "Qubadlının azad olunmasına görə" medalları ilə təltif olunub.