"Zəfər" Şəhid Ailələrinə Dəstək İctimai Birliyinin Azərbaycan Respublikası Mədəniyyət Nazirliyinin dəstəyi ilə təşkil etdiyi "Şəhid övladlarının incəsənət akademiyası" layihəsinin 3-cü həftəsi tamamlanıb.
Modern.az xəbər verir ki, 7-12 yaşlı 25 məktəbli şəhid övladlarının iştirakı ilə keçirilən akademiya ərzində iştirakçılar musiqi və rəsm sahələri üzrə təlimlərdə iştirak edirlər. Təlimlər zamanı ölkəmizin tanınmış peşəkar incəsənət xadimləri akademiyanı ziyarət edərək öz bilik və bacarıqlarını şəhid övladları ilə bölüşürlər. Ötən təlimlər ərzində Azərbaycan Respublikasının əməkdar artisti Təyyar Bayramov akademiyanın musiqi qrupunun, Xalq rəssamı, Azərbaycan Milli Xalça Muzeyinin eksperti, Rəssamlar İttifaqının dekorativ tətbiqi sənət şöbəsinin rəhbəri Aydın Rəcəbov və Əməkdar rəssam, Azərbaycan Rəssamlıq Akademiyasının müəllimi, Azərbaycan Milli Xalça Muzeyinin aparıcı eksperti professor Məmmədhüseyn Hüseynov isə rəsm qrupunun qonağı olublar və iştirakçılara ustad dərsləri keçiblər.
Qeyd edək ki, 3 ay davam edəcək layihə ərzində iştirakçılar Qara Qarayev adına Mərkəzi İncəsənət Məktəbində peşəkar təlimçilər - rəssam Nigar Şıxəliyeva və vokal müəllimi Reqina Məcidova tərəfindən keçilən təlimlərdə iştirak edəcəklər. Təlimlər nəticəsində qazanılan bilik və bacarıqlar, həmçinin hazırlanan incəsənət nümunələri layihənin sonunda təşkil olunacaq bağlanış mərasimində təqdim olunacaq.
