Ana Vətən Partiyasının sədri, Milli Məclisin sabiq deputatı Fəzail Ağamalı tanınmış politoloq Zərdüşt Əlizadəni ittiham edib.
Fəzail Ağamalı Modern.az-a müsahibəsində bildirib ki, Zərdüşt Əlizadə ilə münasibətləri onlar hələ 90-cı illərin əvvəllərində Azərbaycan Xalq Cəbhəsinin üzvü olarkən pisləşib. O, Zərdüşt Əlizadənin mərhum eks-prezident Əbülfəz Elçibəyin (Əliyev) həbsi ilə bağlı ona böhtan atdığını vurğulayıb.
"Əbülfəz Elçibəy həbsdən çıxıb gələndən sonra mən onunla tez-tez görüşürdüm. Əlyazmalar İnistutunda işləyirdi. Münasibətimizdə bir gün belə fasilə yaşanmadı. 90-cı illərin əvvəllərində xalq hərəkatı başladı və mən o hərakatın içində Elçibəylə birlikdə idim. Mən Elçibəyin ünvanına, onun həbsinə imkan yaradan izahat versəydim, o, məni necə yanında saxlaya bilərdi?!
Mənə qarşı bu iftiranı yayan Zərdüşt Əlizadəydi. Bir dəfə müzakirə zamanı mən Zərdüşt Əlizadənin ünvanına sərt sözlər söylədim. Dedim ki, sizin atanız Əbülfəz Elçibəyin həbsində çox mühüm rol oynayıb. Onun bütün fəaliyyəti haqqında dosyeləri verənin biri də Şərqşünaslıq İnistutunun müəllimi kimi sizin atanız Mübariz Əlizadə olub. Eyni zamanda Tarix fakültəsinin müdiri kimi Məmməd Əfəndi və digərləri olub. Ondan sonra Zərdüşt yığıncaqların birində dedi ki, Fəzail Ağamalı mənim atam haqqında belə deyir, ancaq məndə olan məlumat görə, onun özü Elçibəyin həbsində vacib rol oynayıb.
Orada Elçibəy özü də çıxış edirdi və dedi ki, Zərdüştün söylədiyi kökündən yanlışdır, Fəzail Ağamalı proseslərdən alnıaçıq, üzüağ çıxdı. Həmin stenoqramı yazan Səfər Alışarlının çıxarmış olduğu kitabda Əbülfəz Elçibəyin bu sözləri yer alıb", - F.ağamalı deyib.
Modern.az-a açıqlamasında Zərdüşt Əlizadə Fəzail Ağamalının fikirlərinə reaksiya verib.
Zərdüşt Əlizadə söyləyib ki, onun əleyhinə AXC-nin ilk günlərində böhtan kampaniyası aparılıb:
“Əbülfəz Əliyevin Xalq Cəbhəsinin yaranmasında rolu sıfıra bərabərdir. Yəni Xalq Cəbhəsinin təşəkkülündə, proqram sənədlərinin yazılmasında onun zərrə qədər rolu yoxdur. O cümlədən onun ətrafının. Sadəcə, təsis konfransında DTK-nın tapşırığı ilə Xalq Cəbhəsinə soxulmuş bir dəstə adam - saxta mandatlı insanların çığır-bağırtısı ilə mənim qəti etirazlarıma baxmayaraq, Əlbüfəzi Xalq Cəbhəsinin sədri elan etdilər. Bu adam həbsaxanaya düşüb-çıxmış adamdır, Xalq Cəbhəsinin demokratik ideyaları ilə heç bir əlaqəsi yoxdur və qatı millətçidir. Xalq Cəbhəsi isə qatı millətçi yox, demokratik təşkilat idi. Əbülfəz Əliyev sədr vəzifəsinə yiyələndikdən sonra bütün işlərə müdaxilə etməyə başladı. Nizamnamədə nəzərdə tutulmadığı halda ətrafına çoxlu qaragüruhçu adam topladı. Yaradıcı təşkilatçıların işinə mane olmağa başladı.
Fəzail Ağamalı Elçibəyin sağ əli, sağ gözüydü. Mənə qarşı çox güclü böhtan kampaniyası gedirdi. Kampaniyanı aparanlar mənim "KQB" agenti olduğumu və atamın 1974-cü ildə Elçibəyi tuturduğunu iddia edirdilər.
AXC Ali Məclisinin 1989-cu ildə keçirilən iclasında Əbülfəz Əliyevin 12 nəfər yerlisi məni ittiham etdilər ki, guya onu mənim atam tutdurub. Əbülfəzin məhkəməsi olanda mən xaricdə - Yəməndə işləyirdim. O məsələdən xəbərim yox idi. Amma mənim institut yoldaşım Yaşar Məsimov çox ləyaqətli, çox təmiz insandır, onu tapıb soruşdum ki, Əbülfəzin məhkəməsi nə olan işdir? Dedi ki, Əbülfəzin məhkəməsində ilk iclasdan sonuncu iclasa qədər iştirak edib. Ona qarşı 3 nəfərin ifadə verdiyini söylədi. Əlavə etdi ki, sənin atanın adı orada yoxdur. Mənim atam Əməkdar elm xadimi, kafedra müdiri, alim, şair idi, onun Əbülfəz kimilərilə nə işi ola bilərdi. Ola bilsin ki, hansısa təşkilatçıların ziyafətində hər ikisi də iştirak etsinlər. Amma onların heç bir dostluq münasibətləri yox idi. Yaşar Məsimov mənə dedi ki, Əbülfəzə qarşı üç adam - Aydın Hacıyev, Hafiz Misgər və Fəzail Ağamalı ittiham ifadəsi veriblər. Mən bunu ertəsi gün AXC Ali Məclisində deyəndə Əbülfəz Əliyev ayağa sıçradı və çığırdı ki, “Fəzail Ağamalı mənim tapşırığımla mənə qarşı ifadə verib ki, bizim təşkilatı xilas etsin”. Mən də dedim ki, yaxşı, sən təşkilatını xilas etdin, Fəzai Ağamalı ifadə verdi, səni tutdular, bəs mənim yaratdığım təşkilata niyə gəlmisən öz təşkilatında qalaydın da... Söz tapmadı deməyə”.
Z.Əlizadə vurğulayıb ki, Fəzail Ağamalı Xalq Cəbhəsinə vəzifə eşqi ilə gəlmişdi:
“Təbii ki, AXC fəallarının məntiqi, ardıcıl düşünmək, nəyisə yadda saxlamaq, dünyanı hansısa məlumat əsasında qiymətləndirmək qabiliyyəti yox idi. Onların əksəriyyət savadsız adamlar idi. Bəziləri hərəkata vətən eşqi ilə, çoxusu da vəzifə eşqilə gəlmişdilər. Fəzail Ağamalı da onlardan bir idi. Onların hər ikisi Heydər Əliyevin hakimiyyətə gəlməsi üçün çalışırdı. Deyirdim ki, Əbülfəz Əliyev Heydər Əliyevin adamıdır. Mənə deyirdilər ki, sən peyğəmbər kimi təmiz adama böhtan atırsan. Doğrudan da sonradan mənim dediklərim təsdiqləndi, Əbülfəz Əliyev hakimiyyəti Heydər Əliyevə təhvil verdi, gedib oturdu Kələkidə. Fəzail Ağamalıya ənam olaraq deputat mandatı verildi. 20 il deputat oldu, sonra da mandatı ötürdü qızına vəssalam. Oğlu da bilmirəm, gömrükdə, yoxsa prokurorluqda işləyir. Hamısı yağlı yerlərdə çalışırlar. Əbülfəzin bütün yaxın adamları parlamentdə oturdular.
Amma Heydər Əliyevin hakimiyyətə qayıdışı həm də onun özünün siyasi bacarığı, savadı ilə bağlı idi. Onun qarşısında oynayanlar isə piyadalar, zəif, satqın adamlar idi”.
