Türkiyənin Yenidən Rifah Partiyasının sədri Fatih Ərbakan qarşıdakı prezident seçkilərində iştirak edəcəyini bildirib.

Modern.az-ın məlumatına görə, F.Ərbakan jurnalist Cünyt Özdemirin YouTube kanalında qonaq olub, prezident seçkiləri və erkən seçki ehtimalı ilə bağlı qiymətləndirmələr edib.

“Payızda erkən seçkilər olmalıdır” deyən Ərbakan prezidentliyə namizədliyini də açıqlayıb və bunları deyib:

"Biz prezidentliyə namizədliyimizi bəyan etmişik. Yenidən Rifah Partiyası seçkilərə təkbaşına girəcək. Heç bir alyansın prezidentliyə namizədini dəstəkləməkdən söhbət gedə bilməz”.

Fatih Ərbakan deyib ki, iqtidar konstitusiyanı dəyişib, onu istədiyi kimi etsə, növbədənkənar seçki istəməyəcək.

“Amma Konstitusiya dəyişikliyi olmasa, prezidentin yenidən namizəd ola bilməsi üçün parlamentə seçki qanunu verəcəklər və məncə, bu halda 2027-ci ildə seçkiyə gedəcəklər”.

Partiya sədri hazırkı Prezident Rəcəb Tayyib Ərdoğanın yaş və sağlamlıq baxımından yorğun olduğunu, Türkiyə Cümhuriyyəti tarixində heç kimin edə bilmədiyi bir müddət iş başında olduğunu, dincəlməyin onun və Türkiyə üçün faydalı olacağını düşündüyünü bildirib

“Fikrimizcə, növbədənkənar seçkilər payızda keçirilməlidir. Xalqın vəziyyətinə, Türkiyənin şərtlərinə və növbədənkənar seçkilərlə bağlı sorğulara baxanda görürəm ki, növbədənkənar seçkilərin tez bir zamanda keçirilməsi faydalıdır”.