Ermənistan xarici işlər nazirinin müavini Vahan Kostanyan Ermənistan-Azərbaycan danışıqlarının dalana dirənməsi ilə bağlı fikirlərlə razılaşmır.
Modern.az Ermənistan KİV-nə istinadən xəbər verir ki, nazir bu gün, fevralın 13-də hökumətin iclasından sonra jurnalistlərə bildirib:
“İstənilən halda, sərhədin demarkasiyası komissiyalarının iclası keçirilib və razılıq var ki, yaxın vaxtlarda yeni iclas keçirilməlidir”.
Sülh müqaviləsi danışıqlarına gəlincə, nazir müavini bildirib ki, Ermənistan kifayət qədər uzun müddətdir ki, Azərbaycana təqdim olunan təkliflərə cavab gözləyir.
“Ümid edirik ki, prosesin davam etməsi üçün tez bir zamanda cavab alacağıq”.
Kostanyan qeyd edib ki, Ermənistan əvvəlki kimi danışıqlarda iştirakını davam etdirir.
“Azərbaycan “Zəngəzur dəhlizi”nə hücum edib onu güc yolu ilə açmaq istəsə, Ermənistan nə edəcək” sualına nazir müavini cavab verib ki, Ermənistan əlində olan bütün vasitələrlə öz ərazi bütövlüyünü müdafiə etməlidir.
