Milli Məclisin keçmiş deputatı Eldəniz Səlimov bir müddət əvvəl həbsdən azadlığa buraxılıb.

Sabiq deputat 2021-ci ildə həbs edilmişdi və həbs müddəti bitdiyi üçün sərbəst buraxılıb.

Eldəniz Səlimovun vəziyyətini və gələcək planları barədə məlumat əldə etmək üçün onun özünə etdiyimiz zənglər cavabsız qalıb.

Modern.az sabiq millət vəkili barədə ona yaxınlığı ilə seçilən parlamentin deputatı Azər Badamovla əlaqə saxlayıb. O, bir müddət əvvəl saytımıza açıqlamasında Eldəniz Səlimovla görüşəcəyini bildirmişdi.

"Onunla təbii ki, görüşəcəyik. Düşmən deyilik ki, bir yerdə olmuşuq, Milli Məclisdə birgə oturmuşuq, yoldaşlıq etmişik", - Azər Badamov deyib.

Ancaq bu dəfə Azər Badamov bildirib ki, Eldəniz Səlimovla bağlı şəxsi sualların onun özünə ünvanlanması daha doğru olar.

Qeyd edək ki, Azər Badamov Eldəniz Səlimovun toxunulmazlıq hüququnun ləğvinə səs verməyən deputatlardan biri olub. O, sabiq deputatla parlamentdə eyni masada əyləşib və iki siyasətçi arasında yaxın əlaqələr olub.