Bələdiyyə seçkilərinin nəticələrinin təsdiq edilməsindən sonrakı 5 gün ərzində bələdiyyə sədrlərinin seçilməsi nəzərdə tutulub. Artıq bir çox bələdiyyələr ilk iclaslarını keçirib, sədr və müavinlər seçilib.Uzun illər ərzində bələdiyyə sədrlərinin icra hakimiyyətlərinin "xahişi" ilə seçildiyi iddia edilirdi. Son illərdə aparılan islahatlar, xüsusilə bələdiyyələrin sayının azaldılması, bu praktikanın aradan qalxacağına dair ümidlər yaratmışdı.
Lakin bölgələrdən gələn xəbərlər göstərir ki, bəzi rayonlarda bələdiyyə sədrlərinin seçimi hələ də icra başçılarının "xahişi" ilə baş tutur.
Bələdiyyələri icra hakimiyyətlərinin necə xilas etmək olar?
Mövzu ilə bağlı Modern.az-a danışan Milli Məclisin Regional məsələlər komitəsinin üzvü Tahir Rzayev bildirib ki, əsas qarşılıqlı əlaqələrin qurulması bələdiyyələrin fəaliyyətinə bilavasitə nəzarətin olması heç də yerli idarəetmə orqanlarının səlahiyyətlərinə müdaxilə hesab edilməməlidir:
“İcra orqanları öz əsasnamələrinə uyğun fəaliyyət göstərirlər. Bələdiyyələr haqda da qanunlar və əsasnamələr mövcuddur. Bələdiyyələr də öz əsasnamələrini uyğun fəaliyyət aparırlar. Qarşılıqlı tədbirlərin görülməsi heç də səlahiyyətin itirilməsi demək deyil. Bəzən hər hansı küçədə təmir-bərpa işləri görülməli olur. Təbii ki, rayon rəhbərliyi icra orqanlarına tapşırılıb. İcra orqanı da bələdiyyə sədri və üzvləri ilə müəyyən məsləhətləşmələr aparır və həmin işin görülməsi bələdiyyəyə həvalə olunur. Yaxud bələdiyyənin fəaliyyətində hər hansı nöqsan varsa, icra orqanları, sözsüz, yerli hakmiyyət orqanı kimi buna müdaxilə edə və nöqsanların aradan qaldırılması üçün müəyyən göstərişlər verə bilər. Qarşılıqlı əlaqələr işin xeyrinədir. Çox təəssüflər olsun ki, bu, bir çox hallarda icra orqanlarından asılılıq kimi dəyərləndirirlər”.
T.Rzayev vurğulayıb ki, seçkilər dövründə müəyyən namizədlərin dəstəklənməsi və irəli sürülməsində icra hakimiyyətləri, bələdiyyələr, hətta deputatlar da öz məsləhətlərini verə bilirlər:
"Məsləhət ondan ibarət olur ki, filankəs bələdiyyə sədri olsa, rayon üçün daha çox iş görə bilər. Həm vətəndaş, həm də seçici kimi rayonun, kəndin xeyri üçün belə təkliflərin verilməsi heç də səlahiyyətlərin alınması deyil. Bu gün bir çox təşkilatlar var ki eyni vəzifəni müəyyən qaydada həyata keçirirlər. Tutaq ki, su məsələsinin nizamlanmasında müəyyən rəhbər və yerli təşkilatlar, eləcə də bələdiyyələr, yerdə olan digər orqanlar dabirgə fəaliyyətə başlayırlar və problemlər aradan qaldırılır. Onda belə çıxır ki, icra orqanları bu məsələyə münasibət bildirirsə, rəhbər orqanın səlahiyyətinə müdaxilə etmiş və ya onu pozmuş oldu? Yox, əslində, belə deyil. Bir çox ölkələrdə bəzi sosial məsələlər var ki bir neçə təşkilat yerinə yetirməyə borcludur. O cümlədən Azərbaycanda da əhalinin sosial qayğıları var. Bu sosial qayğılarla icra orqanları da, bələdiyyələr də, deputat kimi biz də, həmçinin müvafiq orqanlar da məşğul olur. Belə bir anlam yaranmasın ki, onda biz bir-birimizin səlahiyyətlərinə müdaxilə edirik?Yox".
Deputat bəzi icra başçılarının bələdiyyələrin müəyyən səlahiyyəltərinə müdaxilə etdiyi halların olduğunu da qeyd edib:
"Müəyyən problemlər əlbəttə, var. Bəzi icra başçıları ola bilər ki, bələdiyyələrin müəyyən səlahiyyətlərinə müdaxilə etmiş, yaxud onlara qanundankənar tapşırıqlar vermiş ola bilər. Belə hallar var. Ancaq bu, bələdiyyələrin tamamilə öz səlahiyyətlərini itirməsi, icra hakimiyyətindən asılılığı demək deyil. Bələdiyyə sədri qanunları yaxşı bilirsə, münasibət yaratmağı bacarırsa, təbii ki, öz işinin öhdəsindən gəlməyi bacarır. Kim də ələbaxımlılıq edir, qanunları pozursa, əlbəttə, o icra hakimiyyətindən də digər orqanlardan da asılı vəziyyətə düşəcək. Müəyyən yoxlamaların aparılması, müəyyən bələdiyyə sədrlərinin, üzvlərinin inzibati məsuliyyətə cəlb olunması göstərir ki, hələ bir çox bələdiyyələr öz səlahiyyətlərini lazımınca bilmirlər, qanunun tələblərinə əməl etmirlər. Əlbəttə ki, müəyyən şikayətlər də, tövsiyyələr də ola bilər. Ancaq bu, bələdiyyələrin tam asılı olmasına əsas vermir. Seçimdə də, davranışda da, fəaliyyətdə də bələdiyyələr qanunların tələblərinə əməl etməlidirlər. Qanunlara əməl etdirlərsə, öz fəaliyyətlərini düzgün qura bilirlər və asılılıqdan tamamilə kənarda qalırlar. Ancaq bir rayonda, kənddə icra orqanlarının, bələdiyyələrin münasibətində işləməsi heç də ziyanlı deyil, işin xeyrinədir və dövlətin yükünün azaldılmasıdır".
