ABŞ Prezidenti Donald Tramp hakimiyyətə gəldikdən sonra Ukrayna məsələsi ilə əlaqədar Rusiya Prezidenti Vladimir Putinlə dialoqa başlayıb. Qarşıdakı müddətdə Rusiya-ABŞ münasibətlərində yumşalmaların olacağı proqnozlaşdırılır. Hazırki vəziyyətdə Avropa İttifaqı narahatdır. Çünki ABŞ Avropaya özünü müdafiə etməsi və buna görə müdafiə xərclərini artırması barədə mesajlar ünvanlayıb. Eləcə də Çinin vəziyyətdən necə təsirlənəcəyi maraq doğurur.
Bəs ABŞ-Rusiya yaxınlaşması Azərbaycana nələr vəd edir?
Azərbaycan-ABŞ Parlamentlərarası İşçi Qrupunun üzvü Asim Mollazadə Modern.az-a bildirib ki, Rusiya-ABŞ münasibətləri Azərbaycana təsir etmir:
"Azərbaycan bölgədə müharibələrin dayandırılmasını istəyir. Layihələrimizi həyata keçirmək üçün Azərbaycana stabillik çox önəmlidir. Rusiya-ABŞ arasındakı dialoq uzun prosesdir. Onların münasibətləri çox vaxt gərgin olub. Bu münasibətlərin Azərbaycana bilavasitə təsirləri yoxdur. Bizə stabillik, Ukraynada və Yaxın Şərqdə müharibənin dayanması lazımdır. Bu, ölkəmizin maraqlarına uyğundur. Başqa cür yaxınlaşmanın dərinliyinə inanmıram. Çünki ABŞ Rusiyanı artıq ciddi rəqib kimi qəbul etmir".
Deputat vurğulayıb ki, ABŞ-nin ən böyük problemi Çindir:
"Rusiya ilə münasibətləri yaxınlaşdıraraq ABŞ onu Çindən uzaqlaşdırır. Çünki Çin-Rusiya birliyi ABŞ-yə maneçilik törədir. Əslində Avropa Birliyi ABŞ-nin onlara qarşı irəli sürdüyü tələblərdən məmnun deyil. ABŞ deyir ki, Avropa Birliyi öz təhlükəsizliyini təmin etməyə öyrəşməlidir, hərbi xərcləri artırmalıdır. Avropa Birliyi bundan çox narahatdır. Çünki uzun illər təhlükəsizlik məsələləri ilə bağlı bütün xərclər ABŞ-nin üzərindəydi. Avropa İttifaqı sosial xərclərlə bağlı məsələlərini daha rahatlıqla həll edirdi. ABŞ-nin tələbləri, ətrafda olan gərgin vəziyyət Avropa Birliyini çox narahat edir. ABŞ Avropadan daha böyük tariflər tələb edir. Ümumiyyətlə, bu Avropa iqtisadiyyatı üçün ciddi zərbəyə çevrilə bilər. Onun üçün mənə elə gəlir ki, ABŞ-Rusiya münasibətlərinin yaxşılaşması Avropa Birliyini çox narahat edir".
