Bu il Azərbaycanda qış fəslində qar yağışının olmaması turizm sektoruna da mənfi təsir göstərib. Xüsusilə, ölkənin əsas qış turizm mərkəzlərində əvvəlki illərə nisbətən durğunluq müşahidə edilir. 

Turizm sektoru nümayəndələri qış turizminin canlanması üçün alternativ tədbirlər görsələr də, təbii qarın olmaması əsas problemlərdən biri olaraq qalır. İqlim dəyişikliyi nəticəsində qış fəslinin belə keçməsi gələcəkdə bu sahədə yeni strategiyalara ehtiyac yaradacağını göstərir.

Mövzu ilə bağlı Modern.az-a danışan turizm eksperti Rəhman Quliyev bildirib ki, hər il olduğu kimi ənənəvi olaraq qış tətili günlərində və həftəsonlarında paytaxt sakinləri və əcnəbi turistlər regionlara maraq göstərirlər:

“Bu il qar yağışının az olması ilə əlaqədar həftəsonu turlarında nisbətən azalma müşahidə olundu. Amma buna baxmayaraq yenə də daxili tur intensivliyini müşahidə edirik. Nəzərə alsaq ki, Azərbaycana gələn turist sayının əksəriyyətini Körfəz ölkələrindən və Hindistan, Pakistan və Ərəb ölkələrindən gələnlər təşkil edir, onlar da isti ölkələrdə yaşadıqları üçün buraya gələndə dağlıq bölgələrə daha çox maraq göstərirlər. Təbii ki, burada qar yağışı onlar üçün daha maraqlıdır”.

Ekspertin sözlərinə görə, qar yağışının az olması turizmə ciddi təsiri olmasa da, müəyyən qədər daxili turun zəif olmasına səbəb olub:

“Amma buna baxmayaraq quru sərhədləlrin bağlı olması da daxili turlarda canlanma yaradır. Bu gün pandemiyadan əvvələ nəzər salsaq görərik ki, Azərbaycandan Gürcüstana və Rusiyanın yaxın ərazilərinə kütləvi turist axını olurdu. Quru sərhədlərin bağlı olması və bəzi istiqamətlərə uçuşların bağlı olması yerli turizmi nisbətən yaxşılaşdırıb. Regionda olan sanatoriyalar daha da aktivləşməyə başlayıb. Çünki Rusiyadakı sanatoriyalara gedən turist kütləsi regionlarda milli sanatoriyalarımıza üz tuturlar”.