“İcbari tibbi müayinə işçi və cəmiyyətin sağlamlığının qorunmasında mühüm rol oynayır. Xüsusilə təhlükəli və ictimai məsuliyyət daşıyan sahələrdə çalışanlar üçün mütəmadi yoxlanışlar həm işçi, həm də işəgötürən üçün faydalıdır. Azərbaycanda bu proses dövlət tərəfindən tənzimlənir və nəzarət altında saxlanılır”.
Bu barədə Modern.az-a açıqlamasında Milli Məclisin deputatı Pərvanə Vəliyeva deyib.
Onun sözlərinə görə, tibbi müayinələr işçilərin sağlamlığının qorunmasında, istehsalatda təhlükəsizliyin təmin edilməsində və xəstəliklərin qarşısının alınmasında mühüm rol oynayır. Həm işə qəbul zamanı, həm də dövri tibbi yoxlanışlar sağlam və məhsuldar iş mühitinin yaradılması üçün vacibdir:
“Azərbaycan Respublikasının Nazirlər Kabinetinin 5 may 1998-ci il Qərarı ilə işçilərin tibbi müayinədən hökmən keçməsini tələb edən peşələrin, istehsalatların və müəssisələrin siyahısı müəyyən olunmuşdur. Bu siyahıya peşə və iş yeri adı daxil edilmişdir. Bunlardan məktəbəqədər uşaq müəssisələrinin, o cümlədən, bütün tədris-tərbiyə müəssisələrinin işçiləri, doğum evlərinin (şöbələrin), uşaq xəstəxanalarının (şöbələrin), yenidoğulmuşların, vaxtından qabaq doğulmuşların patologiyası şöbələrinin tibb işçiləri, neft-qaz sənayesində, o cümlədən dəniz qazmasında işlər, bütün növ hərəkət edən nəqliyyatla bilavasitə əlaqədar olan işlər, sürücülər, yeyinti-sənaye müəssisələrinin bütün işçiləri və s. həm ilkin, həm də dövrü tibbi müayinədən keçməlidirlər. Bu siyahı üzrə müəyyən olunmuş şəxslər, həmçinin, işə qəbul olduqda və işlədiyi müddətdə ildə bir dəfədən az olmayaraq narkoloji müayinədən keçməlidirlər. Belə müayinələrin keçirilməsi qaydası da sözügedən qərarla təsdiq edilmişdir”.
P.Vəliyevanın sözlərinə görə, icbari tibbi müayinə üzrə işə qəbul zamanı, işçi vəzifəyə başlamazdan əvvəl sağlamlıq vəziyyətini təsdiqləyən tibbi arayış təqdim etməlidir:
“Müəyyən dövrlərdə (illik və ya daha tez-tez) qanunla müəyyən edilmiş sahələrdə çalışan işçilər hər il və ya iki ildən bir müayinədən keçməlidirlər.
Bu məsələ “Sanitariya-epidemioloji salamatlıq haqqında”, Əmək Məcəlləsində, “Əhalinin Sağlamlığının qorunması” haqqında Azərbaycan Respublikası Qanununda öz əksini tapmışdır.
“Əhalinin Sağlamlığının qorunması” haqqında qanuna görə, Azərbaycan Respublikasının Elm və Təhsil Nazirliyi, Azərbaycan Respublikasının Səhiyyə Nazirliyi və Tibbi Ərazi Bölmələrini İdarəetmə Birliyi təhsil müəssisələrinin vəsaiti hesabına əyani təhsil alan tələbələrin hər il kompleks tibbi müayinədən keçirilməsini təmin edir.
Əhalinin hüquqlarının, qanuni mənafelərinin və dövlətin təhlükəsizliyinin müdafiəsi sahəsində çalışan şəxslər, yəni hüquq-mühafizə orqanlarının əməkdaşları və yüksək təhlükə mənbəyi ilə bağlı olan fəaliyyətlə məşğul olan şəxslər işə qəbul olduqda və işlədiyi müddətdə ildə bir dəfədən az olmayaraq narkoloji müayinədən keçməlidirlər”.
Müsahibimiz sonda qeyd edib hərbi qulluqçular, müddətli həqiqi hərbi xidmətə çağırılanlar və bağlaşma əsasında həqiqi hərbi xidmətə könüllü daxil olanlar tibbi müayinədən keçməlidir:
“Psixoloji müayinəyə gəldikdə isə “Psixi yardım” haqqında qanuna əsasən, Azərbaycan Respublikasının Əmək Məcəlləsi ilə müəyyən edilmiş peşə fəaliyyəti yüksək təhlükə mənbəyi ilə bağlı olan iş yerlərində işə qəbul zamanı, Azərbaycan Respublikasının Silahlı Qüvvələrinə hərbi xidmətə və xüsusi təyinatlı təhsil müəssisələrinə qəbul zamanı psixoloji müayinə aparılır və bu müayinələr həmin qanunla tənzimlənir.
Bundan başqa, bəzi özəl müəssisələr, iaşə obyektləri, beynəlxalq brend olan mehmanxanalar burada çalışan işçilərin sağlamlıq vəziyyəti ilə bağlı öz beynəlxalq standartlarına əsasən, işçilərinin digər tibbi yoxlanışlardan keçməsini də tələb edə bilər”.
