Türkiyənin hakim Ədalət və İnkişaf Partiyasının (AK Partiya) Mərkəzi İdarə Heyətinə seçilən keçmiş futbolçu Məsut Özil sosial media hesablarında izləyici sayına görə prezident Rəcəb Tayyib Ərdoğanı geridə qoyan yeganə şəxs olub.
Modern.az xəbər verir ki, Türkiyə mətbuatında yer alan xəbərə görə, AK Partiyanın bazar günü keçirilən 8-ci Böyük Qurultayında sədr və prezident Rəcəb Tayyib Ərdoğanın təşəbbüsü ilə sürpriz adlar Mərkəzi İdarə Heyətində yer alıblar.
Bu şəxslərdən biri də keçmiş futbolçu Məsut Özildir. Futbolu buraxdıqdan sonra Türkiyədə aktiv siyasətə qoşulan Özil sosial media hesablarında izləyici sayına görə prezident Ərdoğanı geridə qoyub.
“Sözcü” xəbər verir ki, Özilin “Facebook”, “X” və “Instagram” hesablarında ümumilikdə 91 milyon izləyicisi var. Prezident Ərdoğanın üç sosial media hesabında izləyicilərinin ümumi sayı 42 milyon 680 mindir.
Xatırladaq ki, Məsud Özil 2009-cu ildə Türkiyə millisində deyil, Almaniya yığmasında oynamağı üstün tutmuşdu. Özil alman qəzetlərinə "Almaniyanı seçdim. Burada özümü rahat hiss etdim, hər şey mənə yaraşır" demişdi.
Özilin futboldan getdikdən sonra siyasətə qoşulması almanları təəccübləndirib.
