"Bu gün Azərbaycanda ailəli insanlar arasında çox mənfi bir tendensiya yaranıb. Onlar ailənin, uşağın məsuliyyətini çəkməkdən sanki yan keçirlər".
Bunu Modern.az-a açıqlamasında sosioloq Üzeyir Şəfiyev bildirib.
O qeyd edib ki, çox rahat şəkildə boşanmağa qərar verirlər, unudurlar ki, bu qərarın ağır fəsadlarını məhz uşaqlar çəkir.
"Onlar bunun fəsadlarını həm indi, həm də ailə quranda çəkirlər. O uşaqlar da potensial boşanma ehtimalı olan gənclər olacaqlar. Boşanma qərarı verən valideynlər bunu fərqində deyillər. İnsanlar çox əfsuslar ki, bu gün eqoist və hedonist, yəni zövqə, həzzə meyilli şəkildə həyat sürdürmək istiqaməti götürüblər. Ailə dəyərləri arxa plana keçib və mənasız xırda mübahisələr bəzən boşanma həddinə gəlib çatır. Bu da çox təəssüf doğurucu haldır və istiqamət olaraq genişlənir", - Üzeyir Şəfiyev bildirib.
Sosioloqun sözlərinə görə, artıq 1-2 uşaq dünyaya gətirdikdən sonra qadınlar tək başına eqoist, hedonist həyat sürdürməyə qərar verirlər:
“Hesab edirəm ki, bu qadın hüquqları ilə bağlı maarifləndirmə işlərinin onlar tərəfindən düzgün qavranmaması ilə izah olunur. Onlar ehtimal ki, qərb güc mərkəzləri tərəfindən Azərbaycan kimi ənənəvi cəmiyyətlərin əsasını sarsıtmaq üçün ailə institutunu hədəf götürən aqressiv feminist dalğanın təsiri altında olan, gender bərabərliyi adı altında “hüquqi maarifləndirmə” aparan bəzi təşviqatçıların işinin “nəticəsi”dir. Bu gün ailə, qadın problemində əsasən kişi-qadın qarşıdurması mövcuddur. Nədənsə məişət zorakılığı deyəndə də qadına qarşı zorakılıq qabardılır. Halbuki məişət zorakılığı qadına, kişiyə və uşağa qarşı olan zorakılıqdır. Güman edirəm ki, bu gün Azərbaycanda süni şəkildə qadın-kişi qarşıdurması yaradılır”.
Sosioloq sonda qeyd edib ki, qadınlar düzgün yönləndirilmir, hüquq bərabərliyi, azadlıq adı altında kişilərə qarşı qoyulur:
“Bu da boşanmaların statistikasında özünü göstərir. Qadınlar iqtisadi fəal kütləyə çevrildikdən, kişilərdən iqtisadi asılılıqdan çıxdıqdan sonra artıq müstəqil eqoist və hedonist həyat sürdürməyə meyilləniblər. Çox əfsuslar olsun ki, ailə dəyərləri dağıdılır. Bu gün məhkəmələrə müraciət edənlərin əksəriyyəti qadınlardır, onlar artıq köhnə qaydalarla yaşamaq istəmirlər. Kişilər də ailəni köhnə qayda ilə idarə edə bilmirlər. Qadınlar bu gün daha müstəqil, sərbəst və bəncil həyat yaşamaq istəyirlər. Onlara televiziyalarda “ailə problemlərinə” köklənən şou xarakterli verilişlər təsir göstərir. Yəni ailə probleminin efirlərə daşınması yolverilməzdir. Eyni zamanda televiziya verilişlərində boşanmış qadınların dəbdəbəli, təntənəli həyatının sərgilənməsi də məhz evdar qadınlarla bağlı mənfi tendensiyaya yol açır. Çox yaxşı olar ki, örnək ailələrdən portret verilişlər nümayiş etdirilməlidir. Vəziyyət o həddə gəlib çatıb ki, bəzi mışhur imzalar da boşanmanı, subaylığı təbliğ edirlər. Hətta günümüzdə boşanmadan sonra parti də keçirirlər. Bunu işbazlar xüsusilə genişləndirmək istəyirlər. Bu da şübhəsiz ki, ailələrə mənfi təsir göstərir. Belə halların qarşısını almaq, ailələri sağlamlaşdırmaq lazımdır. Sosial medianı sağlamlaşdırmaq lazımdır ki, belə mənfi tendensiyalar ailə dəyərlərinə mənfi təsir göstərməsin”.
