Sabiq xarici işlər naziri Tofiq Zülfüqarov sosial şəbəkə hesabında etdiyi paylaşımda xələfi Elmar Məmmədyarova söz atıb.

“Dünən gözlənilmədən ARB-24 telekanalı məni Elmar Məmmədyarovla bir verilişdə birləşdirdi. Düşünürəm ki, o, tezliklə Gela Vasadzenin (gürcü bolger-red.) yutub kanalında məni əvəz edəcək...
Ah, "Rus evi" – sən necə də çoxüzlüsən”, - T. Zülfüqarov bildirib.

Tofiq Zülfüqarov bu atamaca ilə Elmar Məmmədyarovun bir müddət öncə Bakıda fəaliyyəti dayandırılan “Rus evi” ilə əməkdaşlıq etdiyinə işarə vurub. 

Modern.az Tofiq Zülfüqarovun atmacası ilə əlaqədar sabiq Elmar Məmmədyarovla əlaqə saxlayıb.

Saytımıza açıqlamasında eks-nazir bildirib ki, kim nə istəyirsə, danışsın:

“Bilirsiniz, mən belə deyə bilərəm: şokolad deyiləm ki, hamının xoşuna gələm. Mənim də xoşuma gəlməyən adamlar var. Mən onları izləmirəm, heç qulaq da asmıram. Onlar barədə söz demək istəmirəm. Kim nə deyirsə, özü bilər.
Düzünü deyim ki, Tofiq Zülfüqarovun da həmin verilişə dəvət edildiyindən mənim xəbərim olmayıb. Mən həmişə tək çıxış edirəm”.

E.Məmmədyarov ona qarşı iddia edilən "rus casusu" ittihamı ilə bağlı isə bunları deyib:

“Prinsipcə mənim əleyhimə bu iddiaların arxasında kimlərin durduğunu bilirəm. Ancaq bu haqda açıqlama vermək istəmirəm. Yenə deyirəm, 5 ildir mən hakimiyyətdə deyiləm, amma yenə kiminsə qarınağrısı var. Kimlərdisə, onlar həmişə məni yadlarında saxlayırlar”.