Tovuz rayonunun Vahidli kəndinin suvarılma imkanı olan torpaqlarının yerləşdiyi ərazi sakinlərin xəbəri olmadan, fırıldaqçılıq və saxtakarlıq yolu ilə Ağdam kəndinin inzibati ərazisinə daxil edilib.

Modern.az xəbər verir ki, bu iddia ilə Vahidli kəndinin bir qrup sakini müraciət edib.

Sakinlər bu məsələ ilə bağlı narazılığın illərdir davam etdiyini, dəfələrlə aidiyyəti qurumlara müraciətlər etdiklərini, lakin heç bir nəticə əldə edə bilmədiklərini vurğulayıblar.  

Onların sözlərinə görə, qonşu kəndin sakinlərinin xəritələşdirərək öz inzibati ərazilərinə daxil etmək niyyətində olduğu həmin torpaqlar rəsmi dövlət aktı əsasında, 1936-cı ilin inzibati və hərbi xəritələrində Vahidli kəndinin ərazisi kimi öz əksini tapıb: “Keçmiş S.Ağamalı oğlu adına sovxozun vahid bazası əsasında aparılmış dövlət orqanları tərəfindən möhürlənmiş islahat xəritəsi və hər iki kəndin ayrı-ayrılıqda bələdiyyə xəritələri var. Həmin xəritələrdə də Ağdam sakinlərinin iddia etdiyi ərazi birmənalı olaraq Vahidli kəndinin inzibati ərazisi kimi qeyd edilib.

Hazırda iddia olunan ərazidə 22 Vahidli kənd sakini öz ailəsi ilə yaşayır, həmin ərazidə Vahidli kənd sakinlərinin pay torpaqları yerləşir və bu torpaq sahələri sakinlərə məxsusdur. Bu ailələrin əksəriyyəti Sovet dövründə - hər iki kənd bir Sovetlikdə fəaliyyət göstərən zaman rəsmi torpaq ayrılması, sənədi əsasında həyətyanı torpaq sahələri əldə edərək evlərini tikib, artıq 50-60 ildən çoxdur ki, orada yaşayırlar. Təəcüblüsü odur ki, ortada bu qədər dövlət tərəfindən tanınan hüquqi sənədlər, sübut və faktları olan Vahidli kəndinin bir hissəsi Ağdam kəndinin inzibati ərazisi kimi göstərilib. 

İndi bir qrup Ağdam kənd sakini həmin ailələri öz evlərindən qovmağa çalışır. Bundan əlavə, Vahidli kənd sakinlərini onilliklər boyu əkib-becərdikləri torpaqlara buraxmaq istəmir, əraziyə gedən şəxslərə hücum edərək, bizi təhqir və təqiblərə məruz qoyurlar”.

Vahidli kəndi

Vahidli kənd sakinləri bir neçə dəfə məsələ ilə bağlı Tovuz Rayon İcra Hakimiyyətinin başçısı Məmməd Məmmədovun qəbulunda olublar. Onlar deyir ki, görüşlərdə Axınca çayının sol sahilinin, Vahidli kəndinin böyük bir ərazisinin (təxminən 500 hektardan çox bir ərazinin) qeyri-qanuni olaraq elektron kadastr baza məlumatlarında plan ölçülərinin naturada nə üçün dəyişdirildiyini müzakirə ediblər: “Lakin bu günə kimi qurumdan hələ də rəsmi cavab ala bilməmişik. Bu işlərin arxasında Tovuz Rayon İcra Hakimiyyətinin səlahiyyətli şəxslərinin maraqları dayanır”​. 

Sakinlər, həmçinin Vahidli kəndinin ərazisində yerləşən avtomobil yoluna qonşu Ağdam kəndinin adı əks olunan lövhə qoyulmasına etiraz edirər. Bu məqsədlə toplaşan bir qrup sakini Azərbaycan Avtomobil Yolları Dövlət Agentliyinin (AAYDA) yerli ərazi üzrə əməkdaşı ilə də görüşüb, həmin lövhənin sözügedən əraziyə qoyulmasının heç bir qanuni əsasının olmadığını bildiriblər. 

Tovuz Rayon İcra Hakimiyyətindən "Qafqazinfo"ya verilən açıqlamada Tovuz RİH-in Vahidli İnzibati ərazi dairəsi üzrə nümayəndəliyi ilə əlaqə saxlamağımızı məsləhət gördülər. Nümayəndəlikdən isə zənglərə cavab verilməyib.

Vahidli yoluna Ağdam kəndinin lövhəsinin qoyulması ilə bağlı sakinlərin şikayətinə gəlincə isə, AAYDA-dadan bildirildi ki, məsələ ilə bağlı kənd sakinləri Agentliyə rəsmi müraciət ünvanlamalıdır: “Kənd sakinləri AAYDA-ya rəsmi müraciət etsinlər. Müvafiq qurumların əməkdaşları ilə birgə məsələ araşdırılacaq və sakinlərə cavab veriləcək”.

Ağdam kəndi

İqtisadiyyat Nazirliyi yanında Əmlak Məsələləri Dövlət Xidmətindən verilən cavabda deyilib: “Xəritə materiallarına əsasən, keçmiş S.Ağamalı oğlu adına üzümçülük sovxozunun dövlət torpaq uçotuna aid yerquruluşu planında, eləcə də Tovuz rayonunda torpaq islahatı aparılarkən tərtib olunmuş Vahidli və Ağdam kəndləri üzrə aparılmış torpaq islahatına dair kompleks yerquruluşu layihəsində Vahidli və Ağdam kəndləri bir sərhəd hüdudları daxilində olub və hər bir kəndə ayrı-ayrılıqda deyil, hər ikisinə eyni sərhəd daxilində islahat aparılıb. 

Ölkə başçısının 10 fevral 2010-cu il tarixli, 218 nömrəli Fərmanı ilə təsdiq edilmiş “Azərbaycan Respublikasının ərazi vahidlərinin, inzibati ərazi dairələrinin və sahə inzibati ərazi dairələrinin xəritələrinin hazırlanması Qaydası”na uyğun olaraq ölkə ərazisində ərazi vahidlərinin və inzibati ərazi dairələrinin xəritələri hazırlanarkən Tovuz rayonunun Vahidli və Ağdam kənd inzibati ərazi dairələri Ermənistan ilə sərhəddə yerləşdiyindən orada çöl-ölçmə işləri aparılmayıb və bu səbəbdən də xəritələr hazırlanmayıb. Nəzərinizə çatdırırıq ki, “Azərbaycan Respublikasında bələdiyyələrin birləşməsi yolu ilə yeni bələdiyyələrin yaradılması haqqında” Azərbaycan Respublikasının Qanununa əsasən Vahidli, Ağdam, Qazıqulu və Aşağı Öysüzlü kəndləri birləşərək Aşağı Öysüzlü bələdiyyəsi yaradılıb”.