Bəzi valideynlərin övladlarına yerli-yersiz antibiotik verməsi hallarına rast gəlinir. Bir neçə gün əvvəl azyaşlının antibiotik istifadəsindən həyatını itirməsi barədə xəbərlərin yayılması ciddi müzakirələrə səbəb olub.

Səhiyyə Nazirliyindən verilən məlumata əsasən, ölkə ərazisində satışı həyata keçirilən antibiotiklər 2 yolla əldə olunur. Bunlara xarici ölkələrdən gətirilən ya da, yerli istehsalat nümunələri aiddir. Lakin antibiotiklərin istifadəsi zamanı həkim göstərişi önəmlidir. 

Nazirliyin mütəxəssis-eksperti, infeksionist Təyyar Eyvazov Modern.az-a bildirib ki, həkim təyinatı olmadan antibiotiklər istifadəsi qəti qadağandır. Antibiotiklər əsasən bakterial və yoluxucu infeksiyalara qarşı istifadə edilir. Bu preparatlara qarşı yüksək həssaslığı (ağır allergik reaksiyalar, angionevrotik ödem və s.) olan şəxslər tərəfindən istifadə edilməsi əks göstərişlər yarada bilir. 

Həkim qeyd edib ki, bəzi antibiotik preparatlarının istifadəsində yaş məhdudiyyətləri qoyulub, yəni onlardan bəziləri uşaqlarda tətbiq oluna bilməz. Bu onların səhhəti üçün ciddi təhlükə yaradır. 

Bundan başqa, uşaqlarda dərmanların yaşa və çəkiyə görə, bəzi hallarda xəstəliyin ağırlığı və fəsadların olması nəzərə alınmaqla dozalanması mütləq şərt sayılır. Bunlara əməl edilmədikdə, ağır nəticələr əldə edilir. Həmçinin, böyüklər də apteklərdən bu preparatları alarkən, ilk həkim göstərişini gözləməli, ondan sonra uyğun olanını istifadə edə bilər. 

Zərif Sofiyeva