Bakı Mühəndislik Universitetində (BMU) Mühəndislik fakültəsinin Logistika və nəqliyyat kafedrasının təşkilatçılığı ilə tələbələr üçün Beynəlxalq Təchizat Zəncirinin Rəqəmsallaşdırılması Texnologiyaları Konsorsiumunun (SCDC) İdarə Heyətinin üzvü və koordinatoru Valeriy Virkovski tərəfindən master-klass keçirilir.

Modern.az xəbər verir ki, “Rəqəmsal dəhlizlər” mövzusunda ingilis dilində keçirilən master-klasda kafedranın müəllimləri də iştirak edirlər. 

Martın 7-ə kimi davam edəcək master-klasın ilk günündə nəqliyyat və logistika sektorunun (NLS) rəqəmsallaşdırılmasında müasir təcrübələr və yanaşmalardan geniş bəhs olunub. 

 V.Virkovski NLS-in rəqəmsallaşdırılması üzrə milli strategiyanın hazırlanmasında əsas vəzifələr və onun texniki-iqtisadi əsaslandırması, məqsəd indikatoru yanaşması əsasında NLS və ölkənin nəqliyyat modallığında boşluqların təhlili, strateji fəaliyyətlərin kompleks planlaşdırılması, milli rəqəmsal platformanın və elektron logistika sistemlərinin yaradılması, layihənin əsas mərhələlərində nəzərdə tutulan tədbirlərlə milli elektron logistika sisteminin qurulması üçün yol xəritəsinin hazırlanması kimi məsələləri diqqətə çatdırıb.    

Bundan başqa, Beynəlxalq Telekommunikasiya Mərkəzinin milli seqmentləri-məlumat ötürücüləri arasında transsərhəd məlumat mübadiləsi üçün texniki həllər, Azərbaycan Respublikasının iştirak etdiyi beynəlxalq DTC layihələrinin təhlili, Dünya Bankının Transxəzər Beynəlxalq Nəqliyyat Marşrutu layihəsi, Beynəlxalq Şimal-Cənub Nəqliyyat Dəhlizi, Qərb qolu, Zəngəzur dəhlizi və s. üzrə də geniş məlumatlar verilib, Azərbaycanda bu sahədə qarşıda duran məsələlər vurğulanıb.