Müqəddəs Ramazan ayının gəlişi ilə əhalinin müəyyən hissəsi oruc tutur, dində vacib olan ibadətləri yerinə yetirirlər. Namaz qılmaq, dualar etmək, savab əməllər sahibi olmaq bu ayın mühüm əməllərdən sayılır. Lakin məqsədli şəkildə səhv etmək orucu pozan amillərdən hesab edilir.
Bu fikirləri Modern.az saytına Azərbaycan İlahiyyat İnstitunun dosenti, AMEA-nın Şərqşünaslıq İnstitunun aparıcı elmi işçisi, fəlsəfə doktoru, illahiyatçı Elvüsal Məmmədov söyləyib.
O bildirib ki, orucu pozan bir sıra amillər var: "Bunlara bilərəkdən, yemək və su qəbul etmək, cinsi əlaqədə olmaq, vitaminlər və dərmanlar içmək pozur. Əgər, şəxs qəsdən ağız boşluğundan hansısa maddələri daxil edirsə, oruc pozulmuş hesab edilir. Amma tozlu, tüstülü havanı qəbul etmək, ətir vurmaq, oruc zamanı duş qəbul etmək orucu pozmur. Sadəcə, diqqətli olmalıyıq ki, daxilimizə su və başqa maddələr daxil olmasın".
İlahiyatçının sözlərinə görə, bəzi nüanslar var ki, onlar orucu pozmur:
"Lakin, savabını azaldır. Bunlara, yalan danışmaq, qeybət etmək, söyüş söymək, oğurluq etmək, dava-dalaş yaratmaq, insanları incitmək, vaxtını ancaq yatmaq və ya mənasız işlərə həsr etmək aiddir. Ramazanda ac-susuz qalmaqla yanaşı, bütün əzalar ilə oruc tutmaq savabdır. Gözümüzü, dilimizi, qulağımızı, haramdan uzaq tutmaq başlıca şərtdir. Ən əsası isə, əxlaqı təmiz tutmaq önəmlidir".
Zərif Sofiyeva
