Bir neçə ay əvvəl Azərbaycana məxsus 3 gəmi heyəti ilə birlikdə Afrikada - Eritreya sahillərində girov saxlanılıb. “CMS Pəhləvan”, “CMS İgid” və “CMS-3” gəmilərinin heyət üzvlərindən 18 nəfər Azərbaycan vətəndaşıdır.

Zəruri tədbirlərin görülməsi məqsədilə, Eritreya Dövlətinin ərazi sularına girişin beynəlxalq hüquq normaları ziddiyyət təşkil etmədiyinə dair hüquqi əsaslandırma Efiopiya və Rusiya Federasiyasındakı səfirliklər vasitəsilə Eritreya tərəfinə müvafiq nota vasitəsilə çatdırılıb. Eritreya XİN-də, Eritreyanın Türkiyə və Moskvadakı səfirliklərində müvafiq görüşlər keçirilib.

Ancaq hələlik Azərbaycan vətəndaşları sərbəst buraxılmayıb. Xarici işlər naziri Ceyhun Bayramov yanvarın 20-də bildirib ki, gəmilərlə bağlı danışıqlar davam edir. Onun sözlərinə görə, danışıqlarda müsbət irəliləyişlər müşahidə olunur. Lakin hələ də girovların geri qayıtması baş tutmayıb.

Modern.az girovların son durumu ilə bağlı gəmilərin məxsus olduğu "Caspian Marine Services B.V." şirkətinin Azərbaycandakı filialı ilə əlaqə saxlayıb.

Şirkətdən saytımıza bildirilib ki, onlar da yeni xəbər gözləyirlər: “Bizdə də əlavə məlumat yoxdur. Lazım olan hər şeyi Eritreya tərəfinə təqdim etmişik. Sizin kimi bizdə xəbər gözləyirik”.

Açıqlamada onlara girovların yaxınları tərəfindən  müraciətlərin daxil olduğunu bildirilib: “Əlbəttə, girovların yaxınları şirkətə müraciət edib, onlarla maraqlanırlar. Onlarla da məşğul olunur. Yəni məhdud olaraq yaxınları ilə danışırlar”.