Əmək Məcəlləsinin 58-ci maddəsinə görə, bir işçi əsas iş yerindən başqa, digər iş yerlərində də əmək fəaliyyəti ilə məşğul ola bilər. Lakin işçi ilə bağlanan müqavilənin şərtləri buna imkan verməlidir. Çünki bəzən əmək müqaviləsində işçinin ayrı yerdə işləməsi ilə bağlı məhdudiyyətlər qoyulur. 

Vəkil Toğrul Məmmədov mövzu ilə Modern.az saytına bildirib ki, qanunda əsas bir işin olmadı nəzərdə tutulub:

"Əlavə iş yerinin (əvəzetmə) sayında isə məhdudiyyət qoyulmayıb. İşçinin bir neçə əlavə iş yeri ola bilər. Burada əsas məqam odur ki, digər işlərin hamısı əsas iş yeri ilə razılaşdırılmalıdır. Yəni, rəhbər şəxs işçiyə müəyyən saatlarda icazə verə bilər. Üstəlik işçinin əmək kitabçası əsas iş yerində qalır".

Ekspert vurğulayıb ki, əlavə iş yerlərində işləmək üçün maksimum 4 saat zaman müddəti qoyulur. İşçi günün 8 saatını əsas iş yerində, 4 saatını isə əlavə iş yerində keçirməlidir. Həftəyə isə əsas işin vaxtı 40 saatdan çox olmadan, əlavə də isə 20 saatı keçməməlidir. Bu da ümumi bir şəxsin 12 saatdan artıq işləyə bilməməsi deməkdir. 

Toğrul Məmmədov söyləyib ki, əgər işçinin işi həddən artıq ağırdısa, o əlavə iş yerində də həmin işdə çalışa bilməz. 15 yaşına çatmış şəxslərlə də əmək müqaviləsi bağlana bilər. Lakin 15-18 yaşlı şəxslər də qısaldılmış iş yerlərində çalışa bilər. 18 yaşdan aşağı şəxslərin həftəlik iş saatı 36 saatı keçməməlidir.

Zərif Sofiyeva