Biləsuvar Rayon Məhkəməsində baş tutan məhkəmə iclasında 2005-ci il təvəllüdlü Cəlilabad sakini təqsirləndirilən şəxs qismində məsuliyyətə cəlb edilib.

Modern.az-ın məlumatına görə, o, Azərbaycan Respublikası Cinayət Məcəlləsinin 178.2.1, 178.2.2, 178.2.4 (dələduzluq) və 320.1-ci (saxta sənəd hazırlama) maddələri ilə ittiham olunub.

Məhkəmə materiallarına əsasən, təqsirləndirilən şəxs atası ilə birlikdə vətəndaşlara əlillik pensiyası düzəltmək adı altında külli miqdarda pul vəsaiti ələ keçirib. Zərərçəkmişlərin ifadələrinə görə, o, müxtəlif vaxtlarda insanları aldadaraq onlardan ümumilikdə on minlərlə manat pul alıb. Pulu bank kartları vasitəsilə köçürtdürən təqsirləndirilən şəxs və atası vətəndaşlara yalan vədlər verərək onları aldatmaqda ittiham ediliblər.

Təqsirləndirilən şəxs məhkəmə qarşısında ilk ifadəsində özünü günahkar hesab etmədiyini bildirsə də, sonradan ittihamları qəbul edib. O, cinayət əməllərini atasının tapşırığı ilə həyata keçirdiyini və bu işlərdə əsas rolun atasına aid olduğunu iddia edib. Məhkəmədə həmçinin məlum olub ki, təqsirləndirilən şəxs bəzi zərərçəkmişlərə vurduğu maddi ziyanın bir qismini geri qaytarıb və onların bəziləri onunla barışıq əldə edib.

Məhkəmə, təqdim olunan sübutları və ifadələri nəzərə alaraq, təqsirləndirilən şəxsin dələduzluq və rəsmi sənədləri saxtalaşdırmaq ittihamı ilə cinayət məsuliyyətinə cəlb olunmasını təsdiqləyib. Son qərar olaraq, məhkəmə təqsirləndirilən şəxsə 2il müddətə azadlığın məhdudlaşdırılması cəzası təyin edib.