AMEA-nın müxbir üzvü, professor Məhəmməd Babanlı növbəti dəfə Gəncə Dövlət Universitetində ustad dərsi keçib.
Gəncə Dövlət Universitetində AMEA-nın müxbir üzvü, dünya şöhrətli alim, kimya elmləri doktoru, GDU-unun Fəxri doktoru, professor Məhəmməd Babanlı “Entropiya fenomeni elmdə və həyatda” mövzusunda ustad dərs keçib.
Nümunəvi dərsdə Gəncə Dövlət Universitetinin Elm və İnnovasiyalar üzrə prorektoru, deputat Pərvin Kərimzadə, Elm və Təhsil Nazirliyinin Murtuza Nağıyev adına Kataliz və Qeyri-üzvi Kimya İnstitutunun laboratoriya müdiri, professor İmir Əliyev, Universitetin Kimya-biologiya fakültəsinin professor-müəllim heyəti, eləcə də tələbələr iştirak etdilər. Prorektor Pərvin Kərimzadə vaxt ayırıb ali təhsil ocağında ustad dərs keçdiyinə görə GDU-nun Fəxri doktoru Məhəmməd Babanlıya minnətdarlığını bildirib. Həmçinin prorektor professorun ən mühüm elmi nailiyyətlərindən, həmçinin elmi kadrların hazırlanması sahəsində səmərəli fəaliyyətindən danışıb. Bildirib ki, professor Məhəmməd Babanlı dünyaca tanınmış alimdir və onun elmi rəhbərliyi ilə 4 kimya elmləri doktoru, 40-dan çox kimya üzrə fəlsəfə doktoru hazırlanıb.
Çıxışlardan sonra professor Məhəmməd Babanlının “Entropiya fenomeni elmdə və həyatda” mövzusunda mühazirəsi dinlənilib. Professor nümunəvi dərsdə entropiyadan doğan bir sıra unikal maraqlı məqamlardan danışıb. Həmçinin dünya şöhrətli alim sadə şəkildə 10 dərsin materialını bir yerə yığaraq entropiya anlayışının üzərinə fokuslanaraq, onu ətraflı şəkildə izah edib.
Sonda ustad dərs iştirakçılarının mövzu ərtafında sualları cavablandırılıb.
