Azərbaycan Respublikasının Gənclər və İdman Nazirliyinin tabeliyində fəaliyyət göstərən Bakı Gənclər Mərkəzinin ənənəvi layihəsi olan "Dastana Dönən Səs 2" mahnı müsabiqəsi bu il Vətən müharibəsi qəhrəmanı, şəhid Emil Şamilovun əziz xatirəsinə həsr olunaraq keçirildi.
Modern.az xəbər verir ki, tədbir şəhidlərimizin ruhunu 1 dəqiqəlik sükutla yad edilməklə və Azərbaycan Respublikasının Dövlət himnini səsləndirməklə başladı.
Müsabiqənin seçim turunda iştirak edən 165 gənc arasından uğurla seçilən 15 gənc iştirakçı öz ifalarını təqdim etdilər. Hər ifadan sonra münsiflər heyəti tərəfindən iştirakçılara peşəkar məsləhətlər və tövsiyələr verildi.
Münsif heyəti qismində Azərbaycan Respublikasının Xalq Artisti Məmməd Səfa Qasımov, bəstəkar və vokalist Qasım Xəlilov və İntiqam Kərimov dəvət olunmuşdur.
Tədbirdə şəhid ailələri, qəhrəman qazilər, millət vəkilləri,Azərbaycan Respublikasının Gənclər və İdman Nazirliyinin nümayəndəsi, təhsil müəssisələrinin rəhbərləri, ictimai mədəniyyət xadimləri, mətbuat işçiləri və gənclər iştirak etmişdir.
Gərgin və maraqlı keçən müsabiqənin nəticələrinə əsasən:
1-ci Yer Rəvanə Vəliyeva
2-ci Yer Fərid Əzizli
3-cü yer Fatimə Hüseynova
İlk üç yeri tutan iştirakçılar Bakı Gənclər Mərkəzinin rəhbəri Nərgiz Babayeva tərəfindən Diplom və qiymətli hədiyyələrlə mükafatlandırıldılar. Digər iştirakçılar isə sertifikatlarla təltif olundular.
Sonda fəxri qonaqlarımız, münsiflər heyəti müsabiqə ilə bağlı müsbət rəylərini, təşəkkürlərini, ürək sözlərini bildirərək, gənclər arasında belə müsabiqələrin daha çox keçirilməsini təqdirəlayiq hesab etdilər.
Tədbirə ev sahibliyi edən Bakı Gənclər Mərkəzinin direktoru Nərgiz xanım Babayevə çıxış nitqində gənclərə hər zaman öz diqqət və qayğısını göstərən, onların rifahı yolunda, istedad və bacarıqlarının üzə çıxarılması istiqamətində mütəmadi tədbirlər, maraqlı layihələr həyata keçirən Gənclər və İdman Nazirliyinə, gənclərə hər zaman dəstək olan Cənab Fərid Qayıbova öz dərin minnətdarlığını bildirdi.
