Ermənistan parlamentinin Xarici əlaqələr üzrə daimi komissiyasının sədri Sarkis Xandanyan Azərbaycan Milli Məclisinin Beynəlxalq münasibətlər və parlamentlərarası əlaqələr komitəsinin sədrinə birgə iclas keçirməyi təklif edib.

O, Ermənistan və Azərbaycan arasında sülh sazişi layihəsi üzrə razılığın əldə olunması fonunda belə bir görüşün keçirilməsini vacib sayıb:

“Xalqın bilavasitə seçdiyi və onların mənafeyini qorumaq məsuliyyətini öz üzərimizə götürən deputatlar kimi rolumuzun vacibliyini vurğulamaqla yanaşı, başa düşürük ki, saziş imzalandıqdan sonra hər iki ölkənin parlamentləri tərəfindən ratifikasiya edilməlidir. Ermənistan Respublikası Milli Assambleyasının Xarici əlaqələr üzrə daimi komissiyasının sədri kimi mən həmkarım, Azərbaycan Milli Məclisinin Beynəlxalq münasibətlər və parlamentlərarası əlaqələr komitəsinin sədri Səməd Seyidova rəhbərlik etdiyimiz qurumların birgə iclasının keçirilməsini təklif etdim.

Bu görüş sülh sazişi layihəsi və onun ratifikasiya prosesi ilə bağlı müzakirələr və fikir mübadiləsi aparmaq imkanı verəcək.

Belə bir təşəbbüs ölkələrimiz tərəfindən həyata keçirilən digər etimad quruculuğu tədbirlərini tamamlaya və regional sabitliyin möhkəmlənməsinə töhfə verə bilər.

Ümid edirəm ki, Azərbaycan Milli Məclisindən həmkarım müsbət cavab verəcək və biz görüşün tarixi, yeri və digər zəruri detallar barədə razılığa gələ biləcəyik. İlk görüş yeri kimi Ermənistan-Azərbaycan sərhədində yerləşən neytral zonanı nəzərdən keçirə bilərik”.

Azərbaycan Milli Məclisinin Beynəlxalq münasibətlər və parlamentlərarası əlaqələr komitəsinin sədri Səməd Seyidov Sarkis Xandanyanın təklifinə münasibət bildirib.


Səməd Seyidov Modern.az saytına açıqlamasında deyib ki, populist çıxışların yeri yoxdur:
 

"İki ölkənin delimitasiya və demarkasiya məsələləri üzrə komissiyaları mövcuddur. Bir neçə dəfə Azərbaycan Milli Məclisinin spikeri Ermənistan parlamentinin spikeri ilə görüş keçirib. Bütün bu proseslər nəzarətdə gedir. Ona görə də populist çıxışların yeri yoxdur".
 

Komitə sədri vurğulayıb ki, danışıqlar artıq sülh sazişinin mətnini formalaşdırıb, indi Ermənistan tərəfindən konkret addımlar atılmalıdır:
 

"O addımlar da konstitusiyanın dəyişidirilməsi, bununla yanaşı, Minsk qrupunun ləğvi ilə bağlıdır. Ermənistan tərəfi çalışır ki, bütün imkanlarla sülh müqaviləsini tələsik imzalasın. Bunun məqsədi ikinci variantı özündə saxlamaqdır. İkinci variantın olmaması üçün gərək Ermənistan konstitusiyasında dəyişiklik edilsin. Bu dəyişikliyi ertələmək üçün Paşinyan tərəfindən "mən bu gün sülh sazişini imzalamağa hazıram", yaxud komitə tərəfindən "ay biz görüşməyə hazırıq" və ya hansısa deputatlar tərəfindən "gəlin, bu saat sənədi imzalayaq" kimi ifadələr səsləndirilir. Bunlar hamısı bir variantı rezervdə saxlamaq məqsədi daşıyır. O variant da Azərbaycan torpaqlarına qarşı iddiadır ki, bu da bizim tərəfimizdən qəbuledilməzdir! Ona görə papaqlarını qarşılarına qoyub düşünsünlər. Kimisə görüşə çağırmaqdansa, hansısa bəyanatlar verməkdənsə, yer axtarıb imza atmaqdansa, bu məsələləri həll etsinlər və hər şey də bitsin".