Gürcüstanın beşinci prezidenti Salome Zurabişvili Qarşıdurmalar Platformasının yaradıldığını  elan edib. O, bütün partiyaları birləşməyə çağırıb.

Modern.az xarici KİV-ə istinadən xəbər verir ki, yeni platformanın əsas tələbləri növbədənkənar seçkilərin keçirilməsi və mitinqlərdə saxlanılan, müxalifətin “vicdan məhbusu” adlandırdığı nümayişçilərin azadlığa buraxılması olacaq.

“Məqsədlərə çatmaq üçün küçə etirazları ilə birlikdə mübarizə aparmaq, onlara uyğun siyasi format vermək lazımdır, ona görə də mən təklif etdim və bu gün sizə vicdan məhbuslarını azad etmək üçün Avropayönlü siyasi spektrin iştirakı ilə Qarşıdurmalar Platformasının yaradılmasını açıqlayıram”, - Salome Zurabişvili bildirib.

 Platformanın tərəfdarları seçkilərdən sonra Zurabişvilinin təşəbbüsü ilə imzalanmış Xartiyaya sadiq olmalıdırlar.

Beşinci prezident onu da xatırladıb ki, artıq 124 gündür ki, ölkədə “müstəqillik, azadlıq və Avropa gələcəyi” tələbi ilə mitinqlər keçirilir. Salome Zurabişvili qeyd edib ki, “Gürcüstanın daxili və hətta xarici düşmənə qarşı mübarizəsi həmişə qeyri-bərabər olub”, “amma Gürcüstan həmişə qalib gəlib, çünki ona sülhpərvər azadlıq döyüşçüləri ordusu rəhbərlik edib”.

Xatırladaq ki, Zurabişvilinin prezident kimi səlahiyyət müddəti ötən il dekabrın 29-da başa çatıb. Həmin gün Gürcüstanın yeni lideri Mixail Kavelaşvilinin andiçmə mərasimi olub.