Bir ana kimi aprel mənim üçün ən çətin günlərdir.
Bunu Modern.az-a Aprel döyüşlərinin 19 yaşlı şəhidi Xalid Əzizzadənin anası Nigar Qasımova bildirib.
“Bu günlər gələndə elə bil dünya başıma yıxılır. Evinin son beşiyi, 19 yaşlı balası şəhid olan ana necə olar?! Mən 7 gün idi Xalidin yanından gəlmişdim. Bayramda ziyarət edəndə onu çox yaxşı gördüm. Övladım arxamca şəhid olaraq gəldi. O, Talış yüksəklikləri uğrunda gedən döyüşlərdə şəhid oldu. Hələ də özümüzə gələ bilmirik. Mənim oğlum o qədər yaxşı övlad idi ki, heç vaxt bizim xətrimizə dəyməmişdi. Ona görə də biz hər il ölüb dirilirik. Ana, ata üçün övlad itirmək çox çətindir. Cəmi 19 yaşı var idi, geridə övladı da yoxdur ki, onunla təskinlik tapaq. Ölümündən sonra Xalidin adını küçəyə verdilər. Deyirəm heç olmasa mən öləndən sonra oğlumun adını yaşasın. Bu bir ana üçün çox çətindir. Heç bir ana bala dağı görməsin”.
